Disha Patani: दिशा पटानीचे वडील राजकारणात ठेवणार पाऊल? निवडणूक लढवण्याची शक्यता
जगदीश सिंह पटानी लढवणार 'ही' निवडणूक?
मुंबई- अभिनेत्री दिशा पटानीने (Disha Patani) अल्पावधीतच बॉलिवूडमध्ये आपलं स्थान निर्माण केलं. अभिनयाव्यतिरिक्त दिशा मॉडेलिंगमुळे जास्त चर्चेत असते. आता दिशाचे वडील जगदीश सिंह पटानी (Jagdish Singh Patani) हे लवकरच राजकारणात पाऊल ठेवणार असल्याचं कळतंय. जगदीश सिंह पटानी यांनी राजकारणात (Politics) प्रवेश करण्याची पूर्ण तयारी केली आहे. ते आधी उत्तरप्रदेश पोलीस विभागात कार्यरत होते. त्यांनी आपल्या पदाचा राजीनामा दिला आहे. त्यानंतर आता ते बरेली शहराच्या महापौरपदासाठी निवडणूक लढवण्याची शक्यता वर्तवली जात आहे. गेल्या काही काळापासून ते बरेली शहरात कार्यरत आहेत.
जगदीश सिंह यांच्या नावाचे होर्डिंग्स जेव्हा बरेली शहरात लागले, तेव्हापासून ते निवडणूक लढवणार असल्याची जोरदार चर्चा सुरू झाली. त्यानंतर माध्यमांशी बोलताना त्यांना काही राजकीय पक्षांकडून उमेदवारीची तिकिट मिळाल्याचं दिशाच्या वडिलांनी सांगितलं. मात्र जगदीश सिंह पटानी यांनी अद्याप आपला निर्णय जाहीर केला नाही. ते इतर पर्यायांचाही विचार करत आहेत.
दिशाने ‘एमएस धोनी: द अनटोल्ड स्टोरी’ या चित्रपटातून बॉलिवूडमध्ये पदार्पण केलं. या चित्रपटात तिची भूमिका छोटीच होती, पण त्यालाही प्रेक्षकांचा खूप चांगला प्रतिसाद मिळाला. नुकतीच ती ‘एक व्हिलन रिटर्न्स’ या चित्रपटात झळकली होती. बॉक्स ऑफिसवर या चित्रपटाला फारसा चांगला प्रतिसाद मिळाला नव्हता. ‘योद्धा’ आणि ‘प्रोजेक्ट के’ हे तिचे चित्रपट आगामी काळात प्रेक्षकांच्या भेटीला येणार आहेत.
