अमिताभ, अजय देवगनच्या सहकलाकाराचं निधन, 35व्या वर्षी प्राणज्योत मालवली; मृत्यूचं कारण धक्कादायक

मुंबई | 24 डिसेंबर 2023 : बॉलिवूडमधून एक दु:खद आणि धक्कादायक बातमी आहे. प्रसिद्ध अभिनेते अपूर्व शुक्ला यांचं निधन झालंय. वयाच्या अवघ्या 35 व्या वर्षी अपूर्व यांनी जगाचा निरोप घेतला. भोपाळमधील हमीदिया रुग्णालयात त्यांच्यावर उपचार सुरू होते. अपूर्व गेल्या काही महिन्यांपासून डिप्रेशनच्या आजाराने ग्रस्त होते. त्यांच्यावर उपचारही सुरू होते. त्यानंतर ते घरी आले होते. घरीच त्यांचा मृत्यू झाला. अपूर्व यांनी बॉलिवूडमधील अनेक दिग्गजांसोबत काम केलंय. त्यांनी अनेक टीव्ही शोमध्येही काम केलं. पत्रकारिता जगतातही ते सक्रिय होते.

तीन वर्षापूर्वी अपूर्व यांची आई इंदिरा यांचं निधन झालं होतं. त्यामुळे ते कोलमडून गेले होते. त्यानंतर एक वर्षापूर्वी अपूर्व यांचे वडील पंकज शुक्ला यांचं निधन झालं होतं. वडिलांच्या निधनाचा त्यांना प्रचंड धक्का बसला होता. त्यामुळे ते हळूहळू डिप्रेशनमध्ये गेले होते. त्यातून ते बाहेरच आले नाही. अपूर्व हे आधी वडील पंकज शुक्ला आणि आई इंदिरा शुक्ला यांच्यासोबत जहांगीरबाद येथील अहीर मोहल्ला येथे राहत होते. वडिलांच्या निधानानंतर त्यांनी घर सोडलं आणि रैन बसेरा येथे राहायला आले होते. त्यांनी सर्वांशी संपर्कही तोडला होता. बुधवारी पोलिसांना फोन आला. रैन बसेरा येथे एका व्यक्तीचा मृत्यू झाल्याचं सांगण्यात आलं. पोलिसांनी घटनास्थळी पाहणी केल्यावर अपूर्व शुक्ला यांचा मृतदेह आढळून आला.

खिशात चिठ्ठी आणि मोबाईल नंबर

अपूर्व शुक्ला यांच्या खिशात पोलिसांना एक चिठ्ठी सापडली. त्या चिठ्ठीवर एक मोबाईल नंबर होता. पोलिसांनी हा नंबर डायल केल्यावर तो नंबर अपूर्व शुक्लाच्या मावशीचा असल्याचं समजलं. मावशीकडूनच अपूर्व शुक्लाबाबतची माहिती मिळाली. तसेच अपूर्व गेल्या काही महिन्यांपासून डिप्रेशनने ग्रस्त झाल्याचंही कळलं होतं. अपूर्व हे अभिनेते आणि पत्रकारही होते, असं त्यांच्या मावशीने सांगितलं. अपूर्व यांचे वडीलही पत्रकार होते.

अमिताभ सोबत काम

अपूर्व यांनी त्यांच्या फिल्मी करिअरची सुरुवात टीव्ही शोमधून केली. त्यांनी अमिताभ बच्चन आणि अजय देवगन यांच्या सिनेमातही काम केलं. चक्रव्यूह, सत्याग्रह, जय गंगाजल आणि तबादला सारख्या सिनेमात त्यांनी काम केलं. त्याशिवाय ते झी टीव्ही आणि सोनी टीव्हीवरील काही एपिसोडमध्येही दिसले होते.