Mahima Chaudhary: महिमा चौधरीला ब्रेस्ट कॅन्सर; ओळखणही झालं कठीण
या व्हिडीओत महिमाने तिला कर्करोगाचं निदान कसं झालं याबद्दल सांगितलं आहे. कॅन्सरचं निदान आणि उपचार यांबद्दल बोलताना ती भावूक झाली. तिच्या धैर्याबद्दल अनुपम खेर यांनी तिला 'हिरो' असं म्हटलं आहे.
एकेकाळी बॉलिवूड गाजवणारी अभिनेत्री महिमा चौधरी (Mahima Chaudhary) हिला स्तनाच्या कर्करोगाचं (Breast Cancer) निदान झालं. गुरुवारी सोशल मीडियावर एक व्हिडीओ पोस्ट करत अभिनेते अनुपम खेर (Anupam Kher) यांनी याबद्दलचा खुलासा केला. या व्हिडीओत महिमाने तिला कर्करोगाचं निदान कसं झालं याबद्दल सांगितलं आहे. कॅन्सरचं निदान आणि उपचार यांबद्दल बोलताना ती भावूक झाली. तिच्या धैर्याबद्दल अनुपम खेर यांनी तिला ‘हिरो’ असं म्हटलं आहे. महिमाने 1997 मध्ये प्रदर्शित झालेल्या ‘परदेस’ या चित्रपटातून बॉलिवूडमध्ये पदार्पण केलं. हा चित्रपट त्यावेळी तुफान गाजला. आपल्या सौंदर्याने आणि अभिनयाने तिने प्रेक्षकांची मनं जिंकली.
‘महिमा चौधरीच्या धैर्याची ही कथा आहे. जवळपास एक महिन्यापूर्वी अमेरिकेतून मी महिमाला फोन केला होता. माझ्या ‘द सिग्नेचर’ या 525व्या चित्रपटातील महत्त्वपूर्ण भूमिकेबद्दल मला तिच्याशी बोलायचं होतं. तिच्याशी बोलल्यानंतर मला समजलं की तिला ब्रेस्ट कॅन्सरचं निदान झालं आहे. महिमा ज्याप्रकारे कर्करोगाचा सामना करतेय, ते जगातील अनेक महिलांसाठी प्रेरणादायी ठरू शकतं. कर्करोगाबद्दल सर्वांना सांगताना मी तिच्यासोबत राहावं अशी तिची इच्छा होती. पण महिमा.. तू खरंच हिरो आहेस. मित्रांनो, तुमचं प्रेम, आशीर्वाद तिला द्या. ती सेटवर परतली आहे आणि आता पुन्हा काम करण्यास सज्ज झाली आहे’, अशी पोस्ट अनुपम खेर यांनी लिहिली.
पहा व्हिडीओ-
View this post on Instagram
अनुपम यांनी तिला चित्रपटात काम करण्याविषयी विचारलं. तेव्हा महिमा त्यांना म्हणाली की तिला हा चित्रपट करायला आवडेल पण ते तिची वाट पाहू शकतील का? महिमाच्या या व्हिडीओमध्ये ती सुरुवातीला हसत बोलताना दिसते. पण कॅन्सरविषयी बोलताना ती रडू लागते. अनुपम हे तिला विचारतात की तिला ब्रेस्ट कॅन्सरचं निदान कधी आणि कसं झालं? त्यावर महिमाने सांगितलं की तिला ब्रेस्ट कॅन्सरची कोणतीही लक्षणं नव्हती. ती दरवर्षी तिचं चेकअप करून घेत होती. अचानक एकेदिवशी चेकअप केल्यानंतर डॉक्टरांनी तिला बायोप्सी करण्याचा सल्ला दिला. बायोप्सी केल्यानंतर तिला ब्रेस्ट कॅन्सर झाल्याचं समजलं. महिमाने या व्हिडिओमध्ये सांगितलं की, ते अगदी सुरुवातीच्या टप्प्यात होतं, जे पूर्णपणे बरं होऊ शकतं.
महिमाने 2006 मध्ये बॉबी मुखर्जीशी लग्न केलं होतं. लग्नाच्या सात वर्षांनंतर 2013 मध्ये महिमा आणि बॉबी विभक्त झाले. या दोघांना एरियाना ही मुलगी आहे. 2016 मध्ये ‘डार्क चॉकलेट’ या चित्रपटात महिमा शेवटची झळकली. त्यानंतर ती चित्रपटसृष्टीपासून दूर गेली.
