CJP: वेळ खराब, आयुष्यभर पश्चात्ताप करावा लागेल; आंदोलन करणाऱ्या तरुणांना ‘रामायण’चे सुनिल लहरी स्पष्टच बोलले..

रामानंद सागर यांच्या गाजलेल्या ‘रामायण’ मालिकेत लक्ष्मणाची भूमिका साकारून घराघरांत लोकप्रिय झालेले अभिनेते सुनिल लहरी पुन्हा एकदा चर्चेत आले आहेत. यावेळी त्यांच्या अभिनयामुळे नव्हे, तर तरुणांना दिलेल्या एका महत्त्वाच्या संदेशामुळे ते चर्चेत आहेत. देशातील सध्याच्या परिस्थितीचा संदर्भ देत त्यांनी सोशल मीडियावर एक व्हिडीओ शेअर केला असून, कोणत्याही गोष्टीवर आंधळेपणाने विश्वास ठेवू नका, असा सल्ला दिला आहे. ‘वेळ खूप खराब सुरू आहे. एका चुकीमुळे आयुष्यभर पश्चात्ताप करावा लागू शकतो’, अशा शब्दांत त्यांनी तरुणांना सावध केलं आहे. दिल्लीतील आंदोलनाच्या पार्श्वभूमीवर त्यांचा हा व्हिडीओ चर्चेचा विषय ठरत आहे.

सुनिल लहरी यांनी त्यांच्या व्हिडीओमध्ये सांगितलं की, अनेकदा लोक ऐकीव माहितीवर विश्वास ठेवतात. काही जण आपल्याला जे दाखवू इच्छितात, ते पाहून आपण त्यावर विचार न करता विश्वास ठेवतो. त्यामुळे कधी कधी आपण चुकीच्या गोष्टींच्या बाजूने उभे राहतो आणि नंतर त्याचा पश्चात्ताप करावा लागतो. याबाबत तरुणांना सावध करताना सुनिल लहरी म्हणाले की, कोणतीही माहिती स्वीकारण्यापूर्वी स्वतःच्या बुद्धीचा वापर करणं गरजेचं आहे. केवळ कोणीतरी सांगितलं किंवा सोशल मीडियावर एखादी गोष्ट दिसली, म्हणून तिच्यावर लगेच विश्वास ठेवू नये. माहितीची सत्यता तपासणं आणि परिस्थिती समजून घेणं आवश्यक आहे.

सुनिल लहरी यांचा व्हिडीओ

समय को देखते हुए हम सबको बहुत ही सोच समझकर हर कदम उठाना चाहिए एक गलत कदम बहुत भारी नुक्सान दायक हो सकता है Considering the times, we all should take every step very carefully & thoughtfully, one wrong step can cause huge Loss and harm. https://t.co/ervQXJJi4F

— Sunil lahri (@LahriSunil) October 9, 2026

‘हलक्या कानाचे होऊ नका, डोळे असून आंधळे होऊ नका. अफवांवर विश्वास ठेवू नका आणि स्वतःच्या बुद्धीचा वापर करा’, असा संदेश त्यांनी दिला. सध्याचा काळ संवेदनशील असल्याचं सांगत सुनिल लहरी यांनी प्रत्येक पाऊल विचारपूर्वक उचलण्याचा सल्ला दिला. एखाद्या चुकीच्या निर्णयाचे परिणाम खूप गंभीर असू शकतात. त्यामुळे कोणत्याही गोष्टीच्या प्रभावाखाली येऊन घाईघाईने निर्णय घेऊ नका, असं त्यांनी म्हटलं. विशेषतः तरुणांनी कोणत्याही परिस्थितीत भावनेच्या भरात चुकीचं पाऊल उचलू नये, यावर त्यांनी भर दिला.

दिल्लीतील आंदोलनाच्या पार्श्वभूमीवर व्हिडीओची चर्चा

सुनिल लहरी यांचा हा व्हिडीओ अशा वेळी समोर आला आहे, जेव्हा दिल्लीमध्ये मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आंदोलन सुरू होतं. या आंदोलनादरम्यान पोलिसांनी अनेक आंदोलकांना ताब्यात घेतलं आहे.