रश्मिका मंदाना – विजय देवरकोंडाला 60 कोटींची ऑफर? भानगड काय?
रश्मिका मंदाना आणि विजय देवरकोंडा ही चाहत्यांमध्ये अत्यंत लोकप्रिय जोडी आहे. या दोघांना तब्बल 60 कोटी रुपयांची मोठी ऑफर मिळाल्याची चर्चा आहे. ही ऑफर नेमकी काय आहे आणि कोणाकडून ती देण्यात आली आहे, याबद्दल जाणून घेऊयात..
दाक्षिणात्य चित्रपटसृष्टीतील आणि सध्या बॉलिवूडमध्येही लोकप्रिय ठरलेली जोडी रश्मिका मंदाना आणि विजय देवरकोंडा सध्या त्यांच्या लग्नामुळे तुफान चर्चेत आहेत. या दोघांच्या लग्नाविषयी जोरदार चर्चा रंगली आहे. हे दोघं 2 फेब्रुवारी रोजी लग्नगाठ बांधतील, असा अंदाज आधी व्यक्त करण्यात आला होता. परंतु नंतर या चर्चा अफवा ठरल्या. आता 26 फेब्रुवारी ही नवी तारीख समोर आली आहे. या तारखेला रश्मिका आणि विजय लग्नबंधनात अडकतील, असं म्हटलं जात आहे. या दोघांच्या लग्नाच्या चर्चांदरम्यान नेटफ्लिक्स या ओटीटी प्लॅटफॉर्मकडून त्यांना तब्बल 60 कोटी रुपयांची ऑफर मिळाल्याचं समजतंय. रश्मिका आणि विजयच्या लग्नाच्या व्हिडीओचे डिजिटल राइट्स मिळवण्यासाठी नेटफ्लिक्स इतकी मोठी रक्कम मोजण्यास तयार असल्याचं कळतंय. या चर्चांमागील नेमकं सत्य काय, ते जाणून घेऊयात..
2025 या वर्षाच्या शेवटापासूनच रश्मिका आणि विजयच्या लग्नाच्या चर्चा होत्या. अखेर फेब्रुवारीमध्ये उदयपूरमध्ये धूमधडाक्यात लग्नसोहळा पार पडणार असल्याचं म्हटलं गेलं. उदयपूरच्या सिटी पॅलेसमध्ये रश्मिका-विजयचा शाही विवाहसोहळा संपन्न होईल, अशी माहिती समोर येत आहे. हे दोघं साऊथ आणि बॉलिवूड इंडस्ट्रीत प्रसिद्ध आहेत. गेल्या काही वर्षांत रश्मिकाने बॉलिवूडमध्ये आपली वेगळी ओळख निर्माण केली आहे, छावा, अॅनिमल यांसारख्या बॉलिवूड चित्रपटांमधअये तिने दमदार भूमिका साकारल्या आहेत. तर विजयला बॉलिवूडच्या तुलनेत दाक्षिणात्य चित्रपटसृष्टीत प्रचंड प्रसिद्धी मिळाली. त्यामुळे रश्मिका आणि विजयकडे ‘पॉवर कपल’ म्हणून पाहिलं जातं. या दोघांच्या लग्नासाठी चाहते प्रचंड उत्सुक आहेत. साहजिकच त्याकडे असणारी क्रेझ पाहता डिजिटल राइट्ससाठी चढाओढ सुरू असेल.
दरम्यान नेटफ्लिक्सकडून अद्याप अशी कोणतीही ऑफर देण्यात आली नाही, असं कळतंय. ऑक्टोबर महिन्यात रश्मिका आणि विजयने गुपचूप साखरपुडा केला. हे दोघं त्यांच्या लग्नसोहळ्याविषयीही कमालीची गुप्तता पाळत आहेत. अशातच नेटफ्लिक्सच्या ऑफरचे दावे समोर आल्यानंतर चाहत्यांना त्यांच्या लग्नाबद्दलच्या सर्व चर्चा खऱ्या वाटत आहेत. मिळालेल्या माहितीनुसार, नेटफ्लिक्सने अद्याप त्यांच्याशी कोणतीही डील केलेली नाही किंवा यासंबंधी संपर्क केलेला नाही.
रश्मिका आणि विजयने ‘गीता गोविंदम’ आणि ‘डिअर कॉम्रेड’ या चित्रपटांमध्ये एकत्र काम केलं होतं. सेटवरच दोघं एकमेकांच्या प्रेमात पडले. परंतु दोघंही त्यांच्या नात्याबद्दल कधीच मोकळेपणे व्यक्त झाले नाहीत.
