फक्त 500 रुपये घेऊन मुंबईत आलेली ही अभिनेत्री, ‘धोनी’मुळे एका रात्रीत बनली स्टार, सौंदर्य पाहून..

बॉलिवूडमधील सर्वात ग्लॅमरस, फिट आणि लोकप्रिय अभिनेत्रींपैकी एक असलेल्या दिशा पाटणी हिने आपल्या अभिनय, सौंदर्य आणि फिटनेसच्या जोरावर चित्रपटसृष्टीत वेगळी ओळख निर्माण केली आहे. अनेक यशस्वी चित्रपटांमध्ये काम करत तिने केवळ बॉलिवूडच नाही तर आंतरराष्ट्रीय स्तरावरही स्वतःची छाप सोडली आहे. 13 जून रोजी दिशा तिचा वाढदिवस साजरा करत असून, तिच्या यशामागील संघर्षाची कहाणी अनेकांसाठी प्रेरणादायी ठरते.

खिशात फक्त 500 रुपये घेऊन मुंबईत आगमन

दिशाच्या संघर्षाची सर्वात चर्चित गोष्ट म्हणजे ती अवघे 500 रुपये घेऊन मुंबईत आली होती. एका मुलाखतीत तिने सांगितले होते की, ती मूळतः पायलट बनण्याचे स्वप्न पाहत होती. मात्र मुंबईतील एका स्पर्धेत सहभागी झाल्यानंतर तिला ऑडिशन्सचे फोन येऊ लागले आणि तिच्या आयुष्याला नवे वळण मिळाले. स्वप्नांचा पाठलाग करण्यासाठी तिने सुरक्षित करिअरचा मार्ग सोडून मनोरंजन क्षेत्रात पाऊल टाकले आणि याच निर्णयाने तिचे आयुष्य बदलले.

तेलुगू चित्रपटातून पदार्पण

दिशाने अभिनय क्षेत्रात पहिलं पाऊल 2015 मध्ये प्रदर्शित झालेल्या लोफर या तेलुगू चित्रपटातून टाकले. या चित्रपटात तिने मौनी नावाची भूमिका साकारली होती. अभिनेता वरुण तेज तिच्यासोबत प्रमुख भूमिकेत होता. मात्र हा चित्रपट बॉक्स ऑफिसवर अपयशी ठरला. तरीही दिशाने हार न मानता आपले प्रयत्न सुरू ठेवले.

2016 मध्ये दिशाने बॉलिवूडमध्ये प्रवेश केला. तिचा पहिला हिंदी चित्रपट होता एम.एस. धोनी: द अनटोल्ड स्टोरी. या चित्रपटात तिने महेंद्रसिंग धोनीची गर्लफ्रेंड प्रियंका झा हिची भूमिका साकारली होती. चित्रपटात तिची भूमिका तुलनेने लहान असली तरी तिच्या अभिनयाने आणि स्क्रीन प्रेझेन्सने प्रेक्षकांची मने जिंकली.

सुशांत सिंह राजपूत आणि कियारा अडवाणी यांच्यासोबत काम करताना दिशाने स्वतःची वेगळी छाप निर्माण केली आणि ती रातोरात चर्चेत आली. त्यानंतर दिशा पाटणीने अनेक चित्रपटांमध्ये काम केलं.  ज्यामधील तिच्या अभिनयाचे मोठ्या प्रमाणात कौतुक देखील झालं. आजही ती तिच्या सौंदर्य आणि फिटनेसने चाहत्यांमध्ये आणि सोशल मीडियावर प्रचंड चर्चेत असते.