Samantha | डेट करण्याचा सल्ला देणाऱ्या चाहतीला समंथाचं मजेशीर उत्तर; नेटकऱ्यांकडून होतंय कौतुक
समंथाच्या या उत्तराने चाहत्यांची मनं जिंकली आहेत. समंथाने ऑक्टोबर 2021 मध्ये नाग चैतन्यला घटस्फोट दिला. तेव्हापासून ती सिंगलच आहे. 'कॉफी विथ करण'मध्येही तिने स्पष्ट केलं होतं की आता तिला सिंगलच राहायचं आहे.
हैदराबाद : दाक्षिणात्य चित्रपटसृष्टीतील आघाडीच्या अभिनेत्रींपैकी एक असलेली समंथा रुथ प्रभू सध्या तिच्या आगामी ‘शाकुंतलम’ या चित्रपटाच्या प्रमोशनमध्ये व्यग्र आहे. ती हैदराबादपासून ते मुंबईपर्यंत या चित्रपटाची प्रसिद्धी करतेय. सोशल मीडियावरही समंथाचे चाहते तिला सकारात्मक प्रतिसाद देत आहेत. अशातच रविवारी एका चाहतीने ट्विटरवर समंथाला एक खासगी विनंती केली. तू एखाद्याला डेट कर, असं संबंधित चाहतीने ट्विटरवर लिहिलं. त्यावर समंथाने दिलेलं उत्तर सोशल मीडियावर चांगलंच व्हायरल होत आहे.
रविवारी एका ट्विटर हँडलने समंथाचा एक व्हिडीओ पोस्ट केला आणि त्याच्या कॅप्शनमध्ये लिहिलं, ‘मला माहितीये की मी हे बोलण्याची माझी लायकी नाही. पण तरी समंथा कृपया तू कोणाला तरी डेट कर.’ या ट्विटसोबत चाहतीने हृदयाचा आणि काळजी करतानाचा इमोजी पोस्ट केला. त्यावर समंथाने उत्तर दिलं आहे. समंथाने तिच्या उत्तरात लिहिलं, ‘माझ्यावर तुमच्यासारखं प्रेम कोण करेल?’
समंथाच्या या उत्तराने चाहत्यांची मनं जिंकली आहेत. समंथाने ऑक्टोबर 2021 मध्ये नाग चैतन्यला घटस्फोट दिला. तेव्हापासून ती सिंगलच आहे. ‘कॉफी विथ करण’मध्येही तिने स्पष्ट केलं होतं की आता तिला सिंगलच राहायचं आहे आणि अशाच पद्धतीने जीवनाचा आनंद घ्यायचा आहे.
समंथाने दाक्षिणात्य चित्रपटसृष्टीत स्वत:ची वेगळी ओळख बनवलीच आहे. मात्र आता त्याचसोबत ती हिंदी प्रेक्षकांमध्येही लोकप्रिय झाली आहे. ‘द फॅमिली मॅन 2’ या वेब सीरिजमधील दमदार भूमिका साकारून आणि ‘पुष्पा 2’मधील ‘ऊ अंटावा’ या आयटम साँगमधून तिने हिंदी प्रेक्षकांच्या मनावर विशेष छाप सोडली आहे. समंथाचा ‘शाकुंतलम’ हा चित्रपट येत्या 14 एप्रिल रोजी प्रदर्शित होणार आहे.
Who will love me like you do ?? https://t.co/kTDEaF5xD5
— Samantha (@Samanthaprabhu2) March 26, 2023
गेल्या काही काळापासून समंथा मायोसिटीस या आजाराचा सामना करतेय. मायोसिटिस ही आरोग्याची अशी एक स्थिती आहे ज्यामध्ये स्नायूंमध्ये तीव्र वेदना होतात. मायो म्हणजे स्नायू आणि आयटीस म्हणजे जळजळ (वेदना). याला व्हायरल इन्फेक्शन, विशिष्ट औषधं आणि स्वयं रोगप्रतिकार शक्ती अशी विविध कारणं कारणीभूत असू शकतात.
शाकुंतलमच्या प्रमोशनदरम्यान आजारपणामुळे समंथाच्या चेहऱ्यावरील तेज हरपलंय, अशी कमेंट एका चाहत्याने तिच्या या फोटोंवर केली होती. त्यावर समंथानेही सडेतोड उत्तर दिलं होतं. ‘मी प्रार्थना करते की तुम्हाला माझ्यासारखं अनेक महिने उपचार आणि औषधांचा त्रास सहन करावं लागू नये.. आणि तुमचं तेज वाढवण्यासाठी माझ्याकडून तुम्हाला प्रेम,’ अशा शब्दांत तिने ट्रोलरला फटकारलं होतं.
