Govinda: गोविंदा करणार दुसरं लग्न? कुंडलीतील योग पाहून पत्नी सुनिताला म्हणाला, ‘तयार राहा..’
Govinda and Sunita Ahuja: गोविंदा आणि सुनिता अहुजा यांच्यातील कौटुंबिक वाद काही केल्या संपत नाहीये, सुनिताने घटस्फोटाची याचिका मागे घेतली असली तरी गोविंदावर ती सतत काही ना काही आरोप करत आहे. आता दुसऱ्या लग्नाबद्दल गोविंदा काय म्हणाला होता, ते जाणून घ्या..
बॉलिवूडचा ‘हिरो नंबर वन’ अर्थात अभिनेता गोविंदा आणि त्याची पत्नी सुनिता अहुजा हे त्यांच्या वैयक्तिक आयुष्यामुळे आणि तणावपूर्ण संबंधांमुळे सतत चर्चेत आहेत. गेल्या काही काळापासून त्यांच्या नात्यातील दुरावा स्पष्ट दिसत होता. सुनिताने गोविंदावर अनेक गंभीर आरोप केले होते. या सर्व घडामोडींदरम्यान सुनिताने गुरुवारी घटस्फोटाचा अर्ज मागे घेऊन सर्वांना चकीत केलं. इतकंच नव्हे तर त्यामागील कारण स्पष्ट करत तिने मोठा खुलासासुद्धा केला आहे. अभिनेत्री राखी सावंतशी फोनवर बोलताना सुनिताने सांगितलं, “मी काल केस मागे घेतली, कारण ते दोघं लग्न करणार होते.” सुनिताने गोविंदाच्या विरोधात जाहीरपणे भूमिका मांडत त्याच्या विवाहबाह्य संबंधाचा खुलासा केला. यादरम्यान गोविंदाचं एक जुनं वक्तव्य सोशल मीडियावर व्हायरल होत आहे.
दुसऱ्या लग्नाबद्दल काय म्हणालेला गोविंदा?
एका मुलाखतीत गोविंदाने त्याच्या कुंडलीचा उल्लेख केला होता. ‘स्टारडस्ट’ मासिकाशी बोलताना गोविंदा म्हणाला होता, “उद्या काय होईल, हे मला कधीच माहीत नसतं. कुणास ठाऊक, कदाचित मी एखाद्या मुलीच्या प्रेमात पडेन. मी तिच्याशी लग्नही करेन. पण सुनितान यासाठी तयार राहिलं पाहिजे, तरच मला मोकळं वाटेल. माझ्या कुंडलीत माझी दोन लग्न होतील, असं म्हटलंय.”
राखी सावंतशी बोलताना सुनिता म्हणाली, “मी गेल्या पाच-सहा वर्षांपासून पूर्णपणे शांत आहे. मला सगळीकडून फोन येत आहेत. एक पत्नी म्हणून मला कसं वाटेल? मी काल केस मागे घेतली कारण ते लग्न करणार होते.”
आता गोविंदाचं नाव अभिनेत्री कोमल राणी स्वर्णकारशी जोडलं जात आहे. पत्नी सुनिता अहुजाने गोविंदावर एक्स्ट्रा मॅरिटल अफेअरचे आरोप केले होते. त्यानंतर काही दिवसांपूर्वीच एअरपोर्टवर गोविंदाला अभिनेत्री कोमलसोबत पाहिलं गेलं. तेव्हापासून ही कोमल आहे तरी कोण, असा प्रश्न नेटकऱ्यांना पडला आहे. कोमल ही राणी स्वर्णकार या नावानेही ओळखली जाते. ही नवोदित अभिनेत्री असून सध्या बॉलिवूडमध्ये आपलं स्थान निर्माण करण्यासाठी प्रयत्न करतेय. गोविंदाच्या आगामी ‘रुपा’ या चित्रपटाशी जोडली जाण्यापूर्वी कोमल विशेष चर्चत नव्हती. ती मूळची उत्तर प्रदेशची आहे.
