बॉक्स ऑफिसवर ‘हनुमान’चा बोलबाला; ‘केजीएफ’, ‘कांतारा’लाही दिली मात

मुंबई : 16 जानेवारी 2024 | एकीकडे देशभरातील अनेकांना अयोध्येत होणाऱ्या राम मंदिराच्या प्राणप्रतिष्ठा सोहळ्याची उत्सुकता आहे. तर दुसरीकडे बॉक्स ऑफिसवर ‘हनुमान’ या चित्रपटाचा बोलबाला पहायला मिळतोय. साऊथ सुपरस्टार तेजा सज्जाची मुख्य भूमिका असलेला हा चित्रपट जबरदस्त कमाई करतोय. अवघ्या 20 कोटी रुपयांच्या बजेटमध्ये बनलेल्या या चित्रपटाने भारतात आतापर्यंत 54 कोटी रुपयांचा गल्ला जमवला आहे. चित्रपटाच्या कमाईच्या आकड्यांकडे पाहिलं तर तेलुगू आणि हिंदी व्हर्जनला सर्वाधिक पसंती मिळाली आहे. चित्रपटाच्या कथेसोबतच त्यातील व्हीएफएक्सचंही कौतुक होत आहे. अनेकांनी ओम राऊत दिग्दर्शित ‘आदिपुरुष’ चित्रपटाचा उल्लेख करत ‘हनुमान’ची प्रशंसा केली आहे. ओम राऊत जे काम 150 कोटी रुपयांमध्ये करू शकला नाही ते अवघ्या 20 कोटी रुपये बजेट असलेल्या चित्रपटाने करून दाखवलं, असं नेटकरी म्हणतायत.

हनुमानची आतापर्यंतची कमाई

‘हनुमान’ हा चित्रपट मूळ तेलुगू भाषेत प्रदर्शित झाला होता. पहिल्याच दिवशी त्याने 4 कोटी 15 लाख रुपये कमावले होते. शुक्रवारी या चित्रपटाची कमाई दुपटीने वाढली. दुसऱ्या दिवसापर्यंत कमाईचा आकडा 8 कोटी 5 लाख रुपयांपर्यंत पोहोचला होता. शनिवारी आणि रविवारी या वीकेंडच्या दिवशीही प्रेक्षकांनी थिएटरमध्ये ‘हनुमान’ला भरभरून प्रतिसाद दिला. शनिवारी या चित्रपटाने 12 कोटी 45 लाख रुपयांचा गल्ला जमवला होता. तर रविवारी कमाईचा आकडा 16 कोटींपर्यंत पोहोचला. वेगाने कमाई करणाऱ्या या चित्रपटाच्या हिंदी व्हर्जनने रविवारी 6 कोटी रुपयांची कमाई केली. तर तमिळ व्हर्जनमधून 9 कोटी 76 रुपयांची कमाई झाली.

IMDb वर चित्रपटाला उत्तम रेटिंग

‘हनुमान’ या चित्रपटाने सोमवारी 13 कोटी 56 लाख रुपयांचा गल्ला जमवला आहे. जगभरातील कमाईचा आकडा जोडल्यास या चित्रपटाची जबरदस्त कामगिरी थक्क करणारी आहे. या चित्रपटाने बजेटपेक्षा अधिक कमाई तर केलीच आहे. पण त्यादिवशी बॉक्स ऑफिसवर इतर चित्रपटांकडून टक्कर असतानाही थिएटरमध्ये त्याला अधिकाधिक पसंती मिळतेय. इतकंच नव्हे तर या चित्रपटाला IMDb वर 10 पैकी 9 रेटिंग मिळाली आहे. आयएमडीबी म्हणजेच इंटरनेट मुव्ही डेटाबेस. आयएमडीबी हा ऑनलाइन डेटाबेस प्लॅटफॉर्म असून त्यावर चित्रपट पाहणारे रसिकप्रेक्षक आपल्या रेटिंगद्वारे एखाद्या कलाकृतीचा दर्जा ठरवतात.

तेजा सज्जाच्या या चित्रपटाने कन्नड सुपरस्टार यशच्या ‘केजीएफ : चाप्टर 1’ आणि ऋषभ शेट्टीच्या ‘कांतारा’लाही मागे टाकलंय. केजीएफने प्रदर्शनाच्या पहिल्या सोमवारी 10.60 कोटी रुपयांचा गल्ला जमवला होता. तर ‘कांतारा’ची कमाई 3.7 कोटी रुपये झाली होती. सोमवारी ‘हनुमान’ने 14.50 कोटी रुपयांची कमाई केली.