‘तुझेच मी गीत गात आहे’ मालिकेत ‘राणा दा’ची होणार एण्ट्री; मालिकेत दिसणार ‘या’ भूमिकेत
शुभंकर ठाकूर असं या नव्या पात्राचं नाव असून त्याचं मोनिकासोबत खास नातं आहे. हे नातं नेमकं काय असेल हे मालिकेच्या पुढील भागांमधून उलगडेल. मात्र शुभंकरच्या एण्ट्रीने मालिकेत धमाकेदार वळण येणार हे मात्र नक्की.
मुंबई | 14 ऑगस्ट 2023 : स्टार प्रवाह वाहिनीवरील ‘तुझेच मी गीत गात आहे’ मालिकेचं कथानक सध्या अतिशय उत्कंठावर्धक वळणावर आहे. एकीकडे स्वराजच आपला मुलगा आहे हे सत्य मल्हारसमोर उलगडेल का याची उत्सुकता असताना आता मालिकेत एका नव्या पात्राची एण्ट्री होणार आहे. शुभंकर ठाकूर असं या नव्या पात्राचं नाव असून त्याचं मोनिकासोबत खास नातं आहे. हे नातं नेमकं काय असेल हे मालिकेच्या पुढील भागांमधून उलगडेल. मात्र शुभंकरच्या एण्ट्रीने मालिकेत धमाकेदार वळण येणार हे मात्र नक्की. सुप्रसिद्ध अभिनेता हार्दिक जोशी शुभंकरची व्यक्तिरेखा साकारणार आहे.
या नव्या भूमिकेबद्दल सांगताना हार्दिक जोशी म्हणाला, “स्टार प्रवाह वाहिनीसोबत माझं जुनं नातं आहे. लक्ष्य, पुढचं पाऊल आणि दुर्वा या मालिकांमध्ये मी छोट्या छोट्या भूमिका साकारल्या होत्या. जवळपास आठ वर्षांनी पुन्हा एकदा या लाडक्या वाहिनीसोबत काम करण्याचा योग जुळून आला आहे. एखादं नवं पात्र जेव्हा मालिकेत येतं तेव्हा ते नवी गोष्ट घेऊन येतं. ते पात्र ती गोष्ट रंगवत असतं. शुभंकरच्या येण्याने मालिकेत नवं नाट्य रंगेल. परदेशी असलेला शुभंकर बिझनेसच्या निमित्ताने भारतात आला आहे. शुभंकर स्पष्टवक्ता असला तरी मनाने अतिशय हळवा आहे. त्याला इतरांनी केलेली मदत तो कधीच विसरत नाही. शुभंकरचं कामत कुटुंब आणि मोनिकासोबत नेमकं काय कनेक्शन आहे हे लवकरच उलगडेल.”
View this post on Instagram
काही दिवसांपूर्वी मालिकेतमंजुळा सातारकरची धमाकेदार एण्ट्री झाली होती. मंजुळाच्या येण्याने स्वराजला आपली आई वैदेहीच परत आल्याची खात्री झाली होती. वैदेही सारखी दिसत असली तरी मंजुळा म्हणजे वैदेही नव्हे हे स्पष्ट झालं. पिहूला लोकसंगीत शिकवण्याच्या बहाण्याने तिने कामतांच्या घरात प्रवेश केला. यामागचा तिचा मनसुबा मात्र भलताच होता.
एरव्ही सर्वांवर आपली हुकुमत गाजवणाऱ्या मोनिकाला मंजुळा आपल्या हटके स्टाईलने उत्तर देताना दिसली. या भूमिकेसाठी मंजुळाने नवं रुपही धारण केलं होतं. साडी, ठसठशीत कुंकू आणि लक्ष वेधणारे दागिने असा काहीसा मंजुळाचा अंदाज मालिकेत पाहायला मिळाला. तुझेच मी गीत गात आहे ही मालिका रात्री 9 वाजता स्टार प्रवाह वाहिनीवर प्रेक्षकांच्या भेटीला येते.
