पूर्व पत्नी सुझानसोबत हृतिक रोशनचा ‘डे आऊट’; मुलाने वेधलं नेटकऱ्यांचं लक्ष
अभिनेता हृतिक रोशन नुकताच त्याची पूर्व पत्नी सुझान खानसोबत दिसला. यावेळी त्यांचा मुलगाही सोबत होता. या तिघांचा एक व्हिडीओ सोशल मीडियावर व्हायरल होत आहे. या व्हिडीओमध्ये हृतिक आणि सुझानच्या मुलाने नेटकऱ्यांचं लक्ष वेधलंय.
अभिनेता हृतिक रोशन नुकताच इटलीहून भारतात परतला आहे. आगामी ‘वॉर 2’ या चित्रपटाच्या शूटिंगसाठी तो इटलीला गेला होता. शूटिंगच्या व्यग्र वेळापत्रकातूनही हृतिक त्याच्या कुटुंबीयांसाठी आवर्जून वेळ काढताना दिसून येतो. नुकतंच त्याला पूर्व पत्नी सुझान खानसोबत मुंबईत पाहिलं गेलं. यावेळी दोघांसोबत त्यांचा मुलगासुद्धा होता. पूर्व पत्नी आणि मुलासोबत हृतिकने एकत्र वेळ घालवला. या तिघांचा व्हिडीओ सध्या सोशल मीडियावर व्हायरल होत आहे. या व्हिडीओमध्ये हृतिक आणि सुझानपेक्षाही त्यांच्या मुलाने नेटकऱ्यांचं लक्ष वेधलंय.
12 ऑक्टोबर रोजी दसऱ्याच्या दिवशी हृतिक त्याच्या पूर्व पत्नी आणि मुलासोबत बाहेर गेला होता. यावेळी तिघंही कॅज्युअल लूकमध्ये दिसून आले होते. या व्हिडीओत आधी हृतिक समोरून चालत येताना दिसत आहे, तर सुझान आणि तिचा मुलगा मागे एकत्र येत आहेत. यानंतर आधी हृतिक आणि त्याचा मुलगा एका कारमध्ये बसतात, तेव्हा सुझान त्यांना निरोप देते आणि तिथून तिच्या कारच्या दिशेने पुढे चालत जाते. या व्हिडीओवर नेटकऱ्यांनी विविध प्रतिक्रिया दिल्या आहेत. ‘हे दोघं घटस्फोटानंतर एकमेकांसोबत अधिक वेळ घालवताना दिसतायत’, असं एकाने लिहिलं. तर ‘एकत्रच वेळ घालवायचं होतं तर घटस्फोट का दिला’, असा सवाल दुसऱ्या युजरने केला. तर अनेकांनी हृतिकच्या मुलाबाबतही कमेंट्स केल्या आहेत. ‘हृतिकचा मुलगा हा हृतिकसारखाच हँडसम आहे’, असं नेटकऱ्यांनी लिहिलं आहे.
View this post on Instagram
हृतिक आणि सुझान यांनी लग्नाच्या 14 वर्षांनंतर घटस्फोट घेतला होता. 2014 मध्ये हे दोघं अधिकृतरित्या विभक्त झाले होते. सुझान ही अभिनेते फिरोज खान यांची मुलगी आणि अभिनेता झायेद खानची बहीण आहे. घटस्फोटानंतर सुझान आणि हृतिक दोघं मिळून त्यांच्या दोन्ही मुलांचं संगोपन करत आहेत. त्यामुळे अनेकदा या दोघांना मुलांसाठी एकत्र आल्याचं पहायला मिळालं. इतकंच नव्हे तर हृतिक आणि सुझान आपापल्या वैयक्तिक आयुष्यातही पुढे निघून गेले आहेत. हृतिक सध्या अभिनेत्री सबा आझादला तर सुझान ही अर्सलान गोणीला डेट करतेय. या चौघांमध्येही मैत्रीपूर्ण नातं असल्याचं पहायला मिळतं. या चौघांनाही अनेकदा एकत्र पाहिलं गेलंय. बर्थडे पार्ट्यांनाही हे चौघं एकत्र येतात. किंबहुना सबा आणि सुझान यांच्यातही खूप चांगली मैत्री असल्याचं पहायला मिळतं.
