‘झलक दिखला जा’च्या सेटवर जान्हवी कपूरचा बेली डान्स; माधुरी दीक्षितही झाली तिची फॅन
जान्हवीच्या बेली डान्ससमोर नोरा पडली फिकी; 'झलक दिखला जा'च्या सेटवर अभिनेत्रीची धमाल
मुंबई- अभिनेत्री जान्हवी कपूर सध्या तिच्या ‘मिली’ या चित्रपटाच्या प्रमोशनमध्ये व्यग्र आहे. या चित्रपटाला प्रमोट करण्यासाठी ती नुकतीच ‘झलक दिखला जा 10’ या डान्स शोमध्ये पोहोचली. या शोमध्ये जान्हवीनेही तिच्या जबरदस्त डान्सची एक झलक दाखवली. तिचा डान्स पाहून परीक्षकपदी असलेली माधुरी दीक्षितसुद्धा थक्क झाली होती. हा व्हिडीओ सध्या सोशल मीडियावर चांगलाच व्हायरल होतोय.
जान्हवीने शास्त्रीय नृत्यासोबतच बेली डान्सचंही प्रशिक्षण घेतलं आहे. इन्स्टाग्रामवर याआधीही तिने स्वत:च्या डान्सचे व्हिडीओ पोस्ट केले होते. आता ‘झलक दिखला जा’ या शोच्या मंचावर तिने पुन्हा एकदा बेली डान्स केला. लॉकडाऊनदरम्यान जान्हवीने बेली डान्सचं प्रशिक्षण घेतलं होतं. हा व्हिडीओ पाहून आता तिला हा डान्स उत्तर जमत असल्याचं स्पष्ट दिसतंय.
View this post on Instagram
माधुरी दीक्षित, नोरा फतेही आणि निर्माता-दिग्दर्शक करण जोहर हे या शोचे परीक्षक आहेत. यापैकी माधुरीनेच जान्हवीकडे बेली डान्स करण्याची विनंती केली. जान्हवीला माधुरीची ही विनंती पूर्ण करावीच लागली. तिच्या डान्सचा व्हिडीओ कलर्स टीव्हीच्या अधिकृत इन्स्टाग्राम अकाऊंटवर पोस्ट करण्यात आला आहे.
मिली या चित्रपटात जान्हवीसोबत मनोज पाहवा आणि सनी कौशल यांनी भूमिका साकारल्या आहेत. या चित्रपटाची निर्मिती झी स्टुडिओज आणि बोनी कपूर यांनी केली आहे. येत्या शुक्रवारी हा चित्रपट प्रेक्षकांच्या भेटीला येणार आहे.
