गरम वाफा, जीव गुदमरत होता, ड्रायव्हरचा उद्धटपणा; मराठी अभिनेत्याला शिवशाहीच्या प्रवासाचा भयानक अनुभव, पोस्टद्वारे संताप व्यक्त

गेल्या काही दिवसांपूर्वी शिवशाही ही बस बरीच चर्चेत आली होती ती पुण्यात बसमध्ये एका तरुणीवर झालेल्या अत्याचार प्रकरणावरून. या घटनेनंत सर्वत्र महाराष्ट्रात संताप पसरला होता. तसेच याच प्रकरणावेळी शिवशाही बसची नेमकी काय अवस्था आहे याबद्दलही बरीच चर्चा झाली. आता एका मराठी अभिनेत्यालाही शिवशाही बसच्या प्रवासाबद्दल असाच एक भयानक अनुभव आला आहे. या अभिनेत्याने आपल्या सोशल मीडिया अकांऊटवरून हा अनुभव शेअरही केला आहे.

मराठी अभिनेत्याला आला शिवशाहीच्या प्रवासाचा भयानक अनुभव 

एका लोकप्रिय मराठी अभिनेत्याने शिवशाहीबाबतचा त्याचा एक वाईट अनुभव शेअर केला आहे. त्यामुळे त्याची एक पोस्ट चर्चेत आली आहे. ही पोस्ट सध्या व्हायरल होते आहे.या अभिनेत्याचं नाव आहे ऋतुराज फडके. ऋतुराज फडकेने नुकताच शिवाशाही बसमधून प्रवास त्याला नेमका कोणत्या अडचणींचा सामना करावा लागला याबद्दलही त्याने सांगितलं आहे. जसं की बसमधला एसी,सर्वच प्रवाशांची झालेली तारांबळ, रिझर्वेशन अशा एक ना अनेक तक्रारी त्याने सांगितल्या आहेत.

गाडी बंद पडली अन्….

ऋतूराजने बसचा फोटो शेअर करत पोस्टमध्ये सांगितलं आहे की, “आजचा दापोली – ठाणे, शिवशाही बसमधला अनुभव… बाहेर खूप जास्त ऊन होतं, गरम होत होतं, म्हणून शिवशाही बसचं रिझर्वेशन केलं. एक 70 km अंतर कापल्यानंतर शिवशाही गाडीचा एसी चालत नव्हता. एसीमुळे कुलिंग होण्यापेक्षा त्यातून गरम वाफा येत होत्या. ड्रायव्हर आणि कंडक्टरला तशी माहिती दिली. ड्रायव्हरने उत्तर दिलं एसी असाच असतो इकडे, तेव्हा गाडी रामवाडी बसस्टॉपवर होती. तिथे ड्रायव्हर गाडी दाखवू शकला असता, परंतु तिथून त्याने गाडी नेली आणि प्रायव्हेट धाब्यावरती थांबवली तिथे जेवणासाठी अर्धा तास गाडी थांबली. त्यानंतर तर अजूनच गरम वाफा यायला लागल्या, बसमध्ये म्हातारी माणसं होती, जीव गुदमरत होता, शेवटी गाडी कशीबशी पनवेलला आली. पनवेलला स्टॅन्डच्या बाहेरच गाडी बंद पडली.” असं म्हणत त्याने बस सुरु झाल्यापासूनचे सर्व अनुभव त्याने शेअर केले आहेत.

“ही दुरवस्था शिवशाही बसची”

पुढे तो म्हणाला,” कशी बशी ती बस स्टँडमध्ये नेली आणि सगळ्यांना उतरायला सांगितलं. मी पनवेलमध्येच उतरून कॅब करून घरी येणार होतो आणि आलो सुद्धा. बस अंदाजे दुपारी अडीच पावणेतीन वाजता ठाणे डेपोत पोहोचते. आश्चर्य करणारी गोष्ट अशी मला एक रात्री आठ वाजता फोन आला, तुम्ही विसापूर स्टॉपवर चढलात ना? दापोली-ठाणे बस मध्ये होतात ना? मी म्हटलं हो. डेपोतून समोरचा व्यक्ती म्हणाला, मग बस कुठे आहे बस अजूनपर्यंत ठाणे डेपोत आलेली नाहीये. ही दुरवस्था शिवशाही बसची.” असं म्हणत ऋतूराजने त्याला आलेला शिवशाहीचा हा भयानक अनुभव सांगितला.