‘स्वरगंधर्व सुधीर फडके’ मध्ये दिसणार ‘हे’ कलाकार; बाबुजींची भूमिका…

गायक, गीतकार, संगीतकार, स्वातंत्र्यसैनिक सुधीर फडके यांच्या जीवनावर आधारित ‘स्वरगंधर्व सुधीर फडके’ चित्रपट प्रेक्षकांच्या भेटीला येत आहे. 1 मे महाराष्ट्र दिनी म्हणजेच उद्या हा सिनेमा प्रदर्शित होत आहे. या चित्रपटातील कलाकारांविषयी जाणून घेऊयात. सुधीर फडके म्हणजेच बाबुजींची भूमिका अभिनेते सुनील बर्वे साकारत आहे. तर त्यांच्या पत्नीची म्हणजेच ललिताबाईंची भूमिका अभिनेत्री मृण्मयी देशपांडे हिने साकारली आहे. तर विख्यात मराठी कवी आणि गीतकार ग. दि. माडगूळकर यांची भूमिका सागर तळाशीकर करत आहेत. या प्रमुख भूमिकांसोबतच इतरही महत्वपूर्ण भूमिका कोण साकारणार याची माहिती समोर आली आहे.

नामवंतांच्या भूमिका कोण साकारणार?

आदिश वैद्य (तरूण सुधीर फडके), अपूर्वा मोडक (आशा भोसले), सुखदा खांडकेकर (माणिक वर्मा), मिलिंद फाटक ( राजा परांजपे), धीरज जोशी (स्वातंत्र्यवीर सावरकर), विहान शेडगे (छोटा राम), विभावरी देशपांडे (सरस्वतीबाई, सुधीर फडकेंची आई), नितीन दंडुके (पाध्ये बुवा), परितोष प्रधान (डॅा. अशोक रानडे), साहेबमामा फतेहलाल (अविनाश नारकर), डॅा हेडगेवार (शरद पोंक्षे), न. ना. देशपांडे ( उदय सबनीस), मोहम्मद रफी (निखिल राऊत), निखिल राजे शिर्के ( श्रीधर फडके) हे कलाकार या व्यक्तिरेखा साकारणार आहेत. या नामवंत कलाकारांना या व्यक्तिरेखांमध्ये पाहणं म्हणजे प्रेक्षकांसाठी पर्वणीच ठरणार आहे.

कलाकारांच्या निवडीबद्दल दिग्दर्शक म्हणाले…

‘स्वरगंधर्व सुधीर फडके’ या सिनेमासाठी कलाकारांनी निवड कशी केली? याबद्दल दिग्दर्शक योगेश देशपांडे यांनी आपलं मत मांडलं. कलाकारांची निवड करताना प्रत्येक कलाकार हा त्या व्यक्तिरेखेसारखा तंतोतंत दिसला पाहिजे, असा माझा अट्टाहास नव्हता. परंतु त्या व्यक्तिरेखेचे गुण त्या कलाकारातून दिसावेत, असं मला वाटत होतं. मुळात मी जाहिरात क्षेत्रातील असल्याने मी प्रत्येक कलाकाराचं स्केच बनवलं. त्यातूनच मग मला माझ्या व्यक्तिरेखा सापडत गेल्या. हे सगळेच कलाकार मातब्बर आहेत आणि त्यांनी या भूमिका चपखल साकारल्या आहेत. प्रेक्षकांना चित्रपट पाहाताना हा अनुभव निश्चितच येईल, असं योगेश देशपांडे म्हणाले.

सौरभ गाडगीळ प्रस्तुत, रिडिफाईन प्रॅाडक्शन्स निर्मित ‘स्वरगंधर्व सुधीर फडके’ हा सिनेमा प्रदर्शनासाठी सज्ज झाला आहे. सौरभ गाडगीळ आणि योगेश देशपांडे हे या सिनेमाचे निर्माते आहेत. तर या चित्रपटाची कथा, पटकथा, संवाद आणि दिग्दर्शन योगेश देशपांडे यांनी केलं आहे.