Nepal Plane Crash: ‘जर विमान क्रॅश झालं तर..’; मैत्रिणीला मेसेज केल्यानंतर ‘रसना गर्ल’ने विमान अपघातात गमावला जीव

मुंबई: नेपाळमध्ये झालेल्या विमान दुर्घटनेनं संपूर्ण जगाला हादरवून सोडलं. मात्र नेपाळमधील अशी दुर्घटना घडल्याची ही काही पहिलीच वेळ नाही. याआधीही नेपाळच्या जॉमसम परिसरात 2012 मध्ये एक विमान क्रॅश झालं होतं. या अपघातात भारताची प्रसिद्ध बालकलाकार तरुणी सचदेवने आपले प्राण गमावले होते. या विमानात तरुणी तिची आई गीता सचदेव यांच्यासोबत प्रवास करत होती. आपली मुलगी आणि पत्नी गमावलेल्या हरिश सचदेव यांना जेव्हा नेपाळ विमान दुर्घटनेविषयी समजलं, तेव्हा त्यांच्या जखमा पुन्हा ताज्या झाल्या.

नुकत्याच दिलेल्या एका मुलाखतीत ते म्हणाले, “जेव्हा मी विमान अपघाताची बातमी ऐकली, तेव्हा माझा राग पुन्हा अनावर झाला. अजूनही अशा घटना घडत आहेत. अशा दुर्घटनेत किती जणांनी आपले प्राण गमावले आणि आणखी किती लोकांचे प्राण त्यांना घ्यायचे आहेत. त्यांची विमानंच खूप जुनी आहेत. स्वत:च्या फायद्यासाठी ते इतरांच्या जीवाचीही पर्वा करत नाहीत. माझी मुलीने आणि पत्नीनेसुद्धा अशाच दुर्घटनेत आपला जीव गमावला होता. आजही मला अशा घटनांबद्दल समजल्यावर मन अस्वस्थ होतं. या अपघातात प्राण गमावलेल्यांच्या कुटुंबीयांच्या दु:खाला मी समजू शकतो.”

‘रसना गर्ल’ म्हणून ओळखल्या जाणाऱ्या तरुणीसोबत घडलेल्या दुर्घटनेविषयी ते पुढे म्हणाले, “मी तेव्हा मुंबईत होतो आणि माझी पत्नी मुलीसह नेपाळला गेले होते. माझ्या मुलीचं तिथे जायचं अजिबात मन नव्हतं. तिला गोव्याला फिरायला जायचं होतं. तिने मला म्हटलं की, बाबा आपण गोव्याला जाऊयात आणि तिथे मी पॅराग्लायडिंग करेन. माझी पत्नी तिच्या टीमसोबत दर्शनासाठी नेपाळला जात होती, त्यामुळे तिने मुलीलाही सोबत नेलं. कदाचित माझ्या मुलीला त्या अपघाताची चुणूक लागली होती की काहीतरी वाईट घडणार आहे. विमानात चढताच तिने तिच्या एका मैत्रिणीला मेसेज केला होता की, जर विमान क्रॅश झाला तर मी सांगू इच्छिते की.. आय लव्ह यू.”

विमान अपघातानंतर बचावकार्यादरम्यान पत्नीचं बरंचसं सामान चोरीला गेल्याचंही त्यांनी सांगितलं. इतकंच नव्हे तर त्यांचं सामान आणि मृतदेह ताब्यात घेण्यासाठी त्यांना नेपाळमध्ये बरंच भटकावं लागलं होतं. तरुणी आणि तिच्या आईच्या निधनानंतर नेपाळ सरकारकडून त्यांना सात लाख रुपये नुकसान भरपाई म्हणून मिळाले होते.