सगळंच उद्ध्वस्त झालं, हे दु:ख असह्य..; अत्यंत जवळच्या व्यक्तीच्या निधनाने खचली नोरा फतेही

प्रसिद्ध अभिनेत्री नोरा फतेहीवर दु:खाचा डोंगर कोसळला आहे. नोराच्या अत्यंत जवळच्या मित्राचं निधन झालं आहे. रविवारी इन्स्टाग्रामवर पोस्ट लिहित नोराने तिच्या भावना व्यक्त केल्या आहेत. मार्स पेड्रोझो असं तिच्या मित्राचं नाव असून तो सेलिब्रिटी हेअर आर्टिस्ट होता. मार्सच्या निधनाने नोरा पूर्णपणे खचली असून हे दु:ख असह्य असल्याचं तिने म्हटलंय. ‘आज मी माझा खूप जवळचा मित्र, एक भाऊ आणि एक विश्वासू माणूस गमावला आहे. तो पहिल्या दिवसापासून माझ्या या प्रवासाचा भाग होता. त्याने माझ्यातील सर्वोत्तम गुण ओळखण्यास मदत केली. तुम्ही जेव्हा कधी मला त्याच्यासोबत पाहिला असाल, तेव्हा मी कायम हसतच होती’, अशा शब्दांत नोरा व्यक्त झाली आहे.

दुसऱ्या एका पोस्टमध्ये तिने पुढे लिहिलंय, ‘आम्ही सर्वकाही एकत्र केलं आहे. याआधी मी कधीच अशा परिस्थितीचा सामना केला नव्हता. त्यामुळे आता सावरायचं कसं हेच मला कळत नाहीये. त्याच्यासाठी तुम्ही सर्वजण प्रार्थना करा. मार्स पेड्रोझो आता आपल्यासोबत नाही, तो फार दूर निघून गेला आहे आणि मी पूर्णपणे खचले आहे. माझं सर्वकाही उद्ध्वस्त झालं आहे.’ मार्सचा सोशल मीडियावर मोठा चाहतावर्ग आहे. इन्स्टाग्रामवर त्याचे 53 हजार फॉलोअर्स आहेत. मार्सच्या इन्स्टाग्रामवर त्याचे अनेक बॉलिवूड सेलिब्रिटींसोबतचे फोटो पहायला मिळतात. त्याने नोराशिवाय जान्हवी कपूर, जॅकलिन फर्नांडिस, खुशी कपूर, तृप्ती डिमरी, मलायका अरोरा, शर्वरी वाघ आणि सुहाना खान यांच्यासाठीही हेअर स्टायलिस्ट म्हणून काम केलं आहे.

नोरा फतेहीची पोस्ट-

नोराशिवाय बॉलिवूडमधल्या इतर काही सेलिब्रिटींनीही सोशल मीडियावर पोस्ट लिहित शोक व्यक्त केला आहे. अभिनेता वरुण धवनने त्याच्या इन्स्टाग्राम स्टोरीवर मार्स पेड्रोझासोबतचा फोटो शेअर करत लिहिलं, ‘तुझ्या आत्म्याला शांती मिळू दे मित्रा. मला विश्वासच बसत नाहीये. काही क्षणांपूर्वीच आपण एकत्र शूट करत होतो, असा भास होतोय.’ अभिनेत्री तारा सुतारियानेही सोशल मीडियावर पोस्ट लिहित मार्सला श्रद्धांजली अर्पण केली आहे. तारासोबत मार्स गेल्या दहा वर्षांपासून काम करत होता.