गर्लफ्रेंडला पटवण्यासाठी ऑरीने थेट आणला LPG सिलिंडर्सचा ट्रक; व्हिडीओ पाहून नेटकरी थक्क!
गर्लफ्रेंडला पटवण्यासाठी ऑरीने थेट एलपीजी सिलिंडर्सच्या ट्रकचं आमिष दाखवलं आहे. सोशल मीडियावर त्याचा हा व्हिडीओ व्हायरल होत असून त्यावर नेटकरी विविध प्रतिक्रिया देत आहेत. पहा हा व्हिडीओ-
अमेरिका-इस्रायलने इराणवर हल्ला केल्यापासून जगभरात त्याचे पडसाद उमटले आहेत. या युद्धामुळे भारतात एलपीजी सिलिंडरचा तुटवडा निर्माण झाला आहे. तुटवड्यामुळे घरगुती सिलिंडर वितरणाला सरकारकडून प्राधान्य दिलं जात असलं तरी अनेकांना सिलिंडरसाठी बुकिंगनंतरही बरेच दिवस प्रतीक्षा करावी लागत आहे. एलपीजी सिलिंडरचा मुद्दा सध्या अत्यंत गंभीर असून अनेक ठिकाणी सिलिंडरचा काळाबाजारही उघड होत आहे. एलपीजी सिलिंडर मिळवण्यासाठी नागरिकांकडून विविध पर्याय अवलंबले जात आहेत. अशातच सोशल मीडिया इन्फ्लुएन्सर आणि अनेक स्टारकिड्सचा जिवलग मित्र ओरहान अवत्रमणी ऊर्फ ऑरी याचा एक व्हिडीओ तुफान व्हायरल होत आहे.
जान्हवी कपूर, खुशी कपूर, सारा अली खान, सुहाना खान, निसा देवगण यांसारख्या स्टारकिड्सचा खास मित्र असलेला ऑरी हा सोशल मीडियावर विविध रील्स पोस्ट करत असतो. त्याच्या रील्सला लाखो व्ह्यूज मिळतात. नुकतीच त्याने एलपीजी सिलिंडरबाबत एक मजेशीर रील पोस्ट केली आहे. जान्हवी आणि खुशी कपूरचे वडील आणि प्रसिद्ध निर्माते बोनी कपूर यांच्यासोबत त्याने हा व्हिडीओ शूट केला आहे. यामध्ये बोनी कपूर हे मुलीचे वडील असून ऑरी त्यांच्या मुलीसाठी मागणी घालतो. “मी तुमच्या मुलीवर खूप प्रेम करतो”, असं ऑरी म्हणताच बोनू कपूर त्याला विचारतात, “पण तुझ्याकडे तिला देण्यासाठी काय आहे?”
View this post on Instagram
या प्रश्नाचं उत्तर देताना ऑरी थेट एलपीजी सिलिंडरचा ट्रकच दाखवतो. कधी सिलिंडर उचलताना तर सिलिंडरची गाडी चालवताना तो पुढे दिसतो. ऑरीच्या या विनोदबुद्धीवर नेटकरी लाइक्स आणि कमेंट्सचा वर्षाव करत आहेत. या व्हिडीओवर खुशी कपूरनेही कमेंट केलं आहे. ‘कोणत्या मुलीसाठी विचारतोय’, असा सवात तिने केला आहे. त्यावर ऑरीने खुशी आणि अंशुला या दोघींची नावं लिहिली आहेत. ऑरीच्या या रीलला तब्बल 4.9 दशलक्ष व्ह्यूज मिळाले आहेत, तर 282 हजार लाइक्स मिळाले आहेत.
दरम्यान एलपीजीचा तुटवडा असताना अनेक ठिकाणी त्याचा काळाबाजारही सुरू आहे. 16 मार्च 2026 रोजी उपनियंत्रक शिधावाटप, ‘फ’ परिमंडळ ठाणे यांच्या वतीने घरगुती गॅसचा काळाबाजार रोखण्यासाठी विशेष कारवाई करण्यात आली. या मोहिमेत ठाणे परिमंडळातील विविध भागांमध्ये तपासणी करण्यात आली. अहवालानुसार, एकूण 247 ठिकाणी तपासणी करण्यात आली. या कारवाईदरम्यान 483 गॅस सिलिंडर जप्त करण्यात आले असून जप्त मालाची एकूण किंमत 3 लाख 21 हजार 222 रुपये इतकी आहे.
