Raja Shivaji : ‘दृश्यम 3’ येताच रितेश देशमुखच्या ‘राजा शिवाजी’ चित्रपटाला झटका; तिसऱ्या गुरुवारी कमाईवर परिणाम
Raja Shivaji Box Office Collection : रितेश देशमुखच्या 'राजा शिवाजी' या चित्रपटाला प्रदर्शित होऊन 21 दिवस पूर्ण झाले आहेत. परंतु प्रदर्शनाच्या तिसऱ्या गुरुवारी या चित्रपटाच्या कमाईवर मोठा परिणाम झाल्याचं पहायला मिळालं.
रितेश देशमुख दिग्दर्शित ‘राजा शिवाजी’ या चित्रपटाला थिएटरमध्ये प्रदर्शित होऊन तीन आठवडे पूर्ण झाले आहेत. पहिल्या दिवसापासून या चित्रपटाने बॉक्स ऑफिसवर दमदार कमाई केली आहे. विशेषकरून महाराष्ट्रात ‘राजा शिवाजी’ या चित्रपटाला जबरदस्त प्रतिसाद मिळाला. या चित्रपटाने भारतात सर्वाधिक कमाई करणाऱ्या मराठी चित्रपटाचा विक्रम आपल्या नावे केला आहे. परंतु प्रदर्शनाच्या तिसऱ्या गुरुवारी म्हणजेच 21 व्या दिवशी या चित्रपटाला साऊथ सुपरस्टार मोहनलाल यांच्या ‘दृश्यम 3’ने थिएटरमध्ये टक्कर दिली आहे. मोहनलाल यांचा हा बहुचर्चित आणि बहुप्रतिक्षित चित्रपट गुरुवारी 21 मे रोजी प्रदर्शित झाला. पहिल्याच दिवशी या चित्रपटाने बॉक्स ऑफिसवर तगडी कमाई केली आहे.
छत्रपती शिवाजी महाराजांच्या शौर्यगाथेवर आधारित ‘राजा शिवाजी’ हा चित्रपट मराठी आणि हिंदी भाषेत प्रदर्शित झाला. या चित्रपटाने प्रदर्शनाच्या पहिल्या दोन आठवड्यांत भरपूर कमाई केली, तर तिसऱ्या आठवड्यात कमाईच्या आकड्यात घट झाल्याचं पहायला मिळालं. सकारात्मक बातमी म्हणजे ‘राजा शिवाजी’ या चित्रपटाने दुसऱ्याच आठवड्यात आपला 75 कोटी रुपयांचा बजेट वसूल केला आहे आणि आता तो नफा कमावत आहे. इतक्यातच या चित्रपटाला मोहनलाल यांच्या ‘दृश्यम 3’कडून स्पर्धेला सामोरं जावं लागत आहे. या चित्रपटाने ‘राजा शिवाजी’च्या तिसऱ्या गुरुवारी होणाऱ्या कमाईला मोठा धक्का दिला आहे. त्यामुळे गेल्या काही दिवसांपासून सतत कोटींच्या घरात होणारी कमाई आता लाखांमध्ये पोहोचली आहे.
‘राजा शिवाजी’ या चित्रपटाने पहिल्या आठवड्यात 52.65 कोटी रुपये कमावले होते. त्यानंतर दुसऱ्या आठवड्यात 24.30 कोटी रुपयांची त्यात भर पडली. तिसऱ्या आठवड्यातील पंधराव्या दिवशी 1.45 कोटी रुपये, सोळाव्या दिवशी 2.70 कोटी रुपये, सतराव्या दिवशी 3.45 कोटी रुपये, अठराव्या दिवशी 1.15 कोटी रुपये, एकोणिसाव्या दिवशी 1.30 कोटी रुपये आणि विसाव्या दिवशी 1.10 कोटी रुपये कमावले. ‘सॅकनिल्क’च्या अर्ली ट्रेंड रिपोर्टनुसार, ‘राजा शिवाजी’ने प्रदर्शनाच्या 21 व्या दिवशी म्हणजेच तिसऱ्या गुरुवारी 1 कोटी रुपयांची कमाई केली आहे. यासह तिसऱ्या आठवड्यातील कमाईचा एकूण आकडा 11.77 कोटी रुपयांच्या घरात पोहोचला आहे.
‘राजा शिवाजी’ या चित्रपटाने भारतात 21 दिवसांत एकूण 89 कोटी रुपयांची कमाई केली आहे. या चित्रपटाचा बजेट जवळपास 75 कोटी रुपये असल्याचं म्हटलं जात आहे. याचा अर्थ 14 कोटी रुपयांचा नफा आतापर्यंत झाला आहे. टक्केवारीनुसार, या चित्रपटाने 18.6 टक्के नफा कमावला आहे.
