तो प्रश्न विचारताच भडकला राजपाल यादव; पत्रकाराचा कॅमेराच हिसकावला, व्हिडीओ व्हायरल
अभिनेता राजपाल यादवचा एक व्हिडीओ सध्या सोशल मीडियावर तुफान व्हायरल होत आहे. या व्हिडीओमध्ये राजपाल एका पत्रकारावर चिडून त्याचा कॅमेरा हिसकावून घेताना दिसून येत आहे.
अभिनेता राजपाल यादव सध्या त्याच्या एका व्हिडीओमुळे सोशल मीडियावर चर्चेत आला आहे. या व्हिडीओमध्ये तो एका पत्रकाराचा कॅमेरा ओढताना दिसून येत आहे. राजपालला त्याच्या माफीनाम्याच्या व्हिडीओवरून संबंधित पत्रकाराने प्रश्न विचारला होता. या प्रश्नावर चिडून त्याने थेट कॅमेरा ओढण्याचा प्रयत्न केला. काही दिवसांपूर्वी राजपालने सोशल मीडियावर एक व्हिडीओ पोस्ट करत चाहत्यांना दिवाळीत फटाके न फोडण्याची विनंती केली होती. फटाक्यांमुळे मुक्या प्राण्यांना त्रास होतो, असं त्याने म्हटलं होतं. यावरून नेटकऱ्यांनी त्याचा एक जुना व्हिडीओ शेअर करत ट्रोल केलं होतं. या जुन्या व्हिडीओमध्ये राजपाल मांसाहार करताना दिसला होता. एकीकडे प्राण्यांना होणाऱ्या त्रासाविषयी बोलणारा राजपाल स्वत: मात्र मांसाहार करतोय, अशी टीका नेटकऱ्यांनी केली होती. या टीकेनंतर राजपालने त्याचा फटाक्यांचा व्हिडीओ डिलिट करत नेटकऱ्यांची हात जोडून माफी मागितली होती.
उत्तरप्रदेशच्या एका हिंदी पब्लिकेशनसाठी काम करणाऱ्या पत्रकाराने सोशल मीडियावर हा व्हिडीओ शेअर केला आहे. यामध्ये राजपालच्या आजूबाजूला काही लोकं दिसत असून तो पत्रकारांच्या प्रश्नांची उत्तरं देत आहे. जेव्हा एक पत्रकार त्याला दिवाळीतील व्हिडीओसंबंधी प्रश्न विचारतो, तेव्हा राजपाल त्याच्यावर वैतागतो आणि त्याचा कॅमेरा हिसकावण्याचा प्रयत्न करतो. हाच व्हिडीओ सोशल मीडियावर शेअर करणाऱ्या पत्रकाराने असा दावा केला आहे की राजपालने तो फोन फेकण्याचा प्रयत्न केला होता. हे काही क्षणसुद्धा कॅमेरात कैद झाले.
लोगों को हंसाने वाले मशहूर फिल्म अभिनेता राजपाल यादव आखिर इतना क्यों भड़क गए?
फिल्म अभिनेता राजपाल यादव आज यूपी के लखीमपुर खीरी जिले के पलिया कस्बे में पहुंचे थे, जहां एक पत्रकार के सवाल पर उनको इतना गुस्सा आ गया कि सवाल पूछ रहे पत्रकार के मोबाइल फोन पर झपट्टा मारकर मोबाइल फोन… pic.twitter.com/Gj7vCRTxEB
— Zameer Ahmad (@zameerahmad_lmp) November 2, 2024
राजपाल यादवचा माफीनामा
‘मी मनापासून माफी मागतो. माझा हेतू दिवाळीचा आनंद कमी करण्याचा नव्हता. दिवाळी हा आपल्या आनंदाचा आणि प्रकाशाचा सण आहे. दिवाळी सर्वांसाठी सुंदर बनवण्यातच आपला खरा सण आहे. तुम्हा सर्वांना खूप साऱ्या शुभेच्छा आणि प्रेम. सर्वजण मिळून या दिवाळीला खास बनवुयात,’ असं कॅप्शन लिहित राजपालने माफीचा व्हिडीओ पोस्ट केला होता. या व्हिडीओमध्ये राजपाल म्हणाला, “सर्वांना दिवाळीच्या खूप खूप शुभेच्छा. आता दोन दिवसांपूर्वी मी माझ्या सोशल मीडियावर एक व्हिडीओ पोस्ट केला होता. तो व्हिडीओ मी लगेच काढून टाकला. या व्हिडीओमुळे देशातील आणि जगातील ज्या लोकांच्या भावना दुखावल्या गेल्या आहेत, त्यांची मी मनापासून माफी मागतो. दिवाळीनिमित्त आनंद साजरा करा, स्वस्थ राहा आणि मस्त राहा.”
फटाक्यांमुळे वायू आणि ध्वनी प्रदूषण होतो आणि प्राण्यांनाही त्रास होतो, म्हणून शांततेत दिवाळी साजरी करा, असं आवाहन त्याने केलं होतं. मात्र यावरून नेटकऱ्यांनी त्याला प्रचंड ट्रोल केलं होतं. राजपालचा जुना मांसाहारी बिर्याणी खातानाचा व्हिडीओ पुन्हा शेअर करत नेटकऱ्यांनी त्याच्यावर टीका केली होती. एकीकडे मांसाहार करता आणि दुसरीकडे दिवाळीला फटाके फोडून प्राण्यांना त्रास देऊ नका, असं म्हणता.. अशा प्रतिक्रिया नेटकऱ्यांनी दिल्या होत्या.
