सासूकडून सतत टीका झाल्यानंतर अंकिता लोखंडेसाठी रितेश देशमुखची पोस्ट चर्चेत
हा शो संपल्यानंतर अंकिता आणि विकी विभक्त होतील की काय, अशी भीती चाहत्यांना वाटू लागली आहे. बिग बॉसच्या घरात विकीला अंकितावर हात उचलतानाही पाहिलं गेलं. तर अंकिताही विकीला लाथ मारताना, चप्पल फेकताना दिसली. फॅमिली वीकदरम्यान जेव्हा विकीची आई बिग बॉसच्या घरात आली, तेव्हा दोघांमधील गोष्टी आणखी विकोपाला पोहोचल्या.
मुंबई : 13 जानेवारी 2024 | ‘बिग बॉस 17’ या शोमधील प्रवास अभिनेत्री अंकिता लोखंडेसाठी अनेक दृष्टीने आव्हानात्मक ठरतोय. पती विकी जैनसोबत बिग बॉसच्या घरात आल्यापासून या दोघांमध्ये सतत भांडणं होताना दिसतायत. यावरून तिला तिच्या सासरच्या मंडळींकडूनही बरंवाईट ऐकावं लागतंय. थेरपी रुममध्ये विकीच्या आईशी बोलल्यानंतर अंकिताला समजलं की तिच्या वागणुकीमुळे तिच्या आईलाही समस्यांचा सामना करावा लागतोय. फॅमिली वीकदरम्यान जेव्हा अंकिताची आई तिला भेटायला आली, तेव्हा ती खूप भावूक झाली. विकीच्या आईकडून सतत तिच्यावर टीका केली जातेय. हे सर्व घडत असतानाच आता अनेक सेलिब्रिटींनी अंकिताची साथ दिली आहे. रितेश देशमुख, काम्या पंजाबी, रिधी डोग्रा, रश्मी देसाई यांसारख्या सेलिब्रिटींनी तिला पाठिंबा दिला आहे.
रितेश देशमुखने ‘एक्स’वर (ट्विटर) अंकितासाठी एक पोस्ट लिहिली आहे. ‘अंकिता खूप चांगल्या मनाची आहे’, असं त्याने म्हटलंय. अभिनेत्री रिधी डोग्रानेही तिच्यासाठी खास पोस्ट लिहिली आहे. ‘प्रत्येक महिलेचं पहिलं पाऊल आणि पहिला प्रयत्न तिचं नातं किंवा लग्न वाचवण्यासाठीच असतो आणि ती ते करेल. त्यामुळे जेव्हा शब्दांनी लढाई लढली जाऊ शकत नाही. तेव्हा विजय हा पेनकिलरचं काम करतो. हा अनुभव तिच्यासाठी कटूगोड असेल. अंकिताने हा शो जिंकावा’, अशी आशा रिधीने व्यक्त केली आहे.
Ankita Lokhande has a good heart !!!! #BiggBoss17
— Riteish Deshmukh (@Riteishd) January 11, 2024
अभिनेत्री काम्या पंजाबीनेही अंकिताचं समर्थन केलं आहे. ‘तुम्ही तुमच्या आयुष्यात कल्पनाही केली नसेल अशा गोष्टी करण्यास हे घर भाग पाडतं. हा प्रवास खूप कठीण आहे आणि प्रत्येक वेळी तुम्हीच बरोबर असाल असं नसतं. चढउतार येतच असतात. पण कोणालाच अशी वागणूक मिळू नये. अंकिता.. तुला वाटतं त्यापेक्षा तू खूप स्ट्राँग आहेस’, असं काम्याने लिहिलंय. याशिवाय अर्जुन बिजलानी, अनिला हसनंदानी, प्रिया मलिक यांनीसुद्धा अंकितासाठी सोशल मीडियावर पोस्ट लिहिल्या आहेत. तिनेच हा शो जिंकावा, अशी इच्छाही अनेकांनी व्यक्त केली आहे.
Every Women’s first instinct is always to do and take everything to keep a relationship/marriage. And she will. So when battles can’t be fought with words. Victory does the job of a painkiller. As bitter sweet as it may feel . I hope she wins. #AnkitaLokhande𓃵 🧿😇♥️ https://t.co/lZ47zG0tCB
— Ridhi Dogra (@iRidhiDogra) January 11, 2024
‘बिग बॉस’च्या घरात प्रत्येक स्पर्धकाच्या संयमाची परीक्षा घेतली जाते. बाहेरच्या जगाशी कोणताच संपर्क न ठेवता बिग बॉसच्या घरात प्रत्येक स्पर्धकाशी जुळवून घेत स्पर्धेत टिकून राहणं खूप आव्हानात्मक असतं. अशातच जवळच्या व्यक्तींकडून साथ मिळाली नाही तर त्याचा नकारात्मक परिणाम त्या स्पर्धकावर होतो. असंच काहीसं सध्या ‘बिग बॉस 17’च्या घरात अंकिता लोखंडेसोबत घडताना दिसतंय. अंकिताने ऑक्टोबर महिन्यात पती विकी जैनसोबत बिग बॉसच्या घरात स्पर्धक म्हणून सहभाग घेतला. तेव्हापासून या दोघांमध्ये सतत विविध कारणांवरून वाद होताना दिसतंय. पतीसोबतचे वाद असतानाच अंकिताची सासू म्हणजेच विकी आईसुद्धा तिच्याविरोधात वक्तव्ये करताना दिसतेय. या सर्वांचा परिणाम अंकितावर झाला असून ती विकीसोबत ब्रेक घेण्याविषयीही बोलताना दिसतेय.
