लग्न अरबाजचं चर्चा सलमानच्या डान्सची.. वहिनीसोबत थिरकला ‘भाईजान’
अभिनेता अरबाज खानने रविवारी मेकअप आर्टिस्ट शुरा खानशी निकाह केला. अरबाजचं हे दुसरं लग्न आहे. बहीण अर्पिताच्या घरीच अरबाज आणि शुराचा निकाह पार पडला. या निकाहनंतरचा एक व्हिडीओ समोर आला आहे. यामध्ये सलमान खान त्याच्या भावाच्या लग्नात नाचताना दिसत आहे.
मुंबई : 25 डिसेंबर 2023 | रविवारी 24 डिसेंबर रोजी अभिनेता अरबाज खानने दुसऱ्यांदा निकाह केला. मेकअप आर्टिस्ट शुरा खानशी अरबाजचा निकाह पार पडला. यावेळी खान कुटुंबीय आणि बॉलिवूड इंडस्ट्रीतील मोजके सेलिब्रिटी उपस्थित होते. अरबाज आणि शुराच्या लग्नातील फोटो आणि व्हिडीओ सध्या सोशल मीडियावर व्हायरल होत आहेत. बहीण अर्पिता खानच्या घरी हा निकाह पार पडला. यावेळी भाऊ सलमान खानच्या उपस्थितीने सर्वांचं लक्ष वेधलं. भावाच्या निकाहला जाताना सलमानने आधी पापाराझींसमोर फोटोसाठी पोझ देणं टाळलं. गाडीतून उतरल्यानंतर तो थेट आत गेला. मात्र आता लग्नातील त्याच्या डान्सचा व्हिडीओ सोशल मीडियावर समोर आला आहे.
सोशल मीडियावरील या व्हिडीओमध्ये सलमान खान हा त्याच्याच ‘तेरे मस्त मस्त दो नैन’ या गाण्यावर नाचताना दिसत आहे. यावेळी त्याच्यासोबत अरबाजचा मुलगा अरहान आणि पत्नी शुरा खानसुद्धा थिरकताना दिसत आहेत. अरहानसोबत सलमान त्याच्या गाण्यावरील ‘हुक अप’ स्टेप करताना दिसला. या व्हिडीओ सध्या सोशल मीडियावर तुफान व्हायरल होत आहे. त्यावर नेटकऱ्यांकडून लाइक्स आणि कमेंट्सचा वर्षाव होतोय.
‘पटना शुक्ला’ या नव्या चित्रपटाच्या सेटवर अरबाज खानची ओळख मेकअप आर्टिस्ट शुरा खानशी झाली. त्याआधी तो मॉडेल जॉर्जिया अँड्रियानीला डेट करत होता. “अरबाज आणि शुराने अचानक निकाहचा निर्णय घेतला आणि मोजक्या पाहुण्यांच्या उपस्थितीत त्यांना निकाह करायचा होता”, अशी माहिती सूत्रांनी दिली. अरबाज आणि शुरा त्यांच्या रिलेशनशिपबद्दल मौन बाळगून होते.
पहा व्हिडीओ
★ ADORING… #SalmanKhan Dancing on #TereMastMast at #ArbaazKhan’s Wedding!
-Dec 24, 2023https://t.co/O9rgzDWGkC pic.twitter.com/aliMrhQTey
— SalmanKhanHolics.com (@SalmanKhanHolic) December 24, 2023
कोण आहे शुरा खान?
शुरा खान ही बॉलिवूडमधील प्रसिद्ध मेकअप आर्टिस्ट आहे. तिचा इन्स्टाग्राम अकाऊंट प्रायव्हेट असून तिचे 13.2 हजार फॉलोअर्स आहेत. शुराने अभिनेत्री रवीना टंडन आणि तिची मुलगी राशा थडानीसाठी मेकअप आर्टिस्ट म्हणून काम केलंय. अरबाज आणि शुराची पहिली भेट ‘पटना शुक्ला’ या चित्रपटाच्या सेटवर झाली.
56 वर्षीय अरबाज हा गेल्या काही वर्षांपासून मॉडेल जॉर्जिया अँड्रियानीला डेट करत होता. मात्र काही दिवसांपूर्वीच जॉर्जियाने एका मुलाखतीत अरबाजशी ब्रेकअप झाल्याचा खुलासा केला. अरबाज आणि शुराच्या लग्नाला आई सलमा खान, सावत्र आई हेलन, भाऊ सोहैल आणि सलमान खान, मुलगा अरहान खान यांच्यासह बॉलिवूडमधील काही सेलिब्रिटीसुद्धा उपस्थित होते. रितेश देशमुख, जिनिलिया देशमुख, रवीना टंडन आणि तिची मुलगी राशा थडानी, साजिद खान यांचा त्यात समावेश होता.
