Samantha | अभ्यासात खूपच हुशार होती समंथा; दहावीचा रिपोर्ट कार्ड पाहून नेटकरी अवाक्!

हैदराबाद : दाक्षिणात्य चित्रपटसृष्टीत आपल्या दमदार अभिनयाची छाप सोडल्यानंतर समंथा रुथ प्रभूने ‘द फॅमिली मॅन’ या वेब सीरिजमधून प्रेक्षकांची मनं जिंकली. समंथा ही साऊथ फिल्म इंडस्ट्रीतील आघाडीच्या अभिनेत्रींपैकी एक आहे. ‘पुष्पा’मधील तिचं ‘ऊ अंटावा’ हे गाणं तुफान गाजलं. आजही पार्ट्यांमध्ये हे गाणं आवर्जून वाजवलं जातं. आता सोशल मीडियावर समंथाच्या शिक्षणाची चर्चा होत आहे. समंथा अभिनयात प्रतिभावान तर आहेच, मात्र ती शालेय शिक्षणातही हुशार होती. तिच्या दहावीचा रिपोर्ट कार्ड सध्या सोशल मीडियावर व्हायरल होत आहे. या रिपोर्ट कार्डमधील समंथाला मिळालेले गुण पाहून नेटकरी तिचं कौतुक करत आहेत.

ट्विटरवर एका युजरने समंथाचा रिपोर्ट कार्ड शेअर केला आहे. या रिपोर्ट कार्डवरून सहज स्पष्ट होतंय की ती उत्तम विद्यार्थिनी होती. समंथाला सर्व विषयांमध्ये 80 पेक्षा जास्त गुण मिळाले आहेत. गणितात तिला 100 गुण तर भूगोल आणि बॉटनी हे विषय सोडून इतर सर्व विषयांमध्ये 90 गुण मिळाले आहेत. भौतिकशास्त्रात तिने 95 आणि इतिहासात 91 गुण मिळवले. या रिपोर्ट कार्डवर शिक्षकाने समंथाचं कौतुकसुद्धा केलं आहे.

समंथाची प्रतिक्रिया

Ha ha this has surfaced again ?❤️ Awww https://t.co/UMQlxH1dsX

— Samantha (@Samanthaprabhu2) May 29, 2020

या व्हायरल रिपोर्ट कार्डवर आता समंथाची प्रतिक्रिया समोर आली आहे. ‘हाहाहाहा… हे पुन्हा व्हायरल होऊ लागलंय’, असं तिने ट्विट केलंय. यावर नेटकऱ्यांनी विविध प्रतिक्रिया दिल्या आहेत. ‘आमची सॅम ऑलराऊंडर आहे’, असं एकाने लिहिलंय. तर ‘तू अभिनेत्रीपेक्षा शिक्षणतज्ज्ञ व्हायला पाहिजे होतंस’, असं दुसऱ्या युजरने म्हटलंय.

समंथाचा शाकुंतलम हा चित्रपट नुकताच प्रदर्शित झाला. या चित्रपटाला प्रेक्षक – समिक्षकांकडून संमिश्र प्रतिसाद मिळाला. तेलुगू, हिंदी, तमिळ, मल्याळम आणि कन्नड अशा पाच भाषांमध्ये हा चित्रपट प्रदर्शित झाला. मात्र पहिल्या दिवशी समंथाच्या चित्रपटाने फक्त 5 कोटी रुपयांचा गल्ला जमवला. शाकुंतलम या चित्रपटात समंथाने शकुंतलाची भूमिका साकारली आहे. शकुंतला ही मेनका आणि विश्वमित्रा यांची कन्या असते. या चित्रपटात मोहन बाबू, प्रकाश राज, अदिती बालन, गौतमी, अनन्या नागल्ला, कबीर दुहन सिंह यांच्याही भूमिका आहेत. विशेष म्हणजे अभिनेता अल्लू अर्जुनची मुलगी अल्लू आऱ्हा या चित्रपटातून तेलुगू चित्रपटसृष्टीत पदार्पण करतेय.