Sankarshan Karhade : मी मरेपर्यंत…संकर्षण कऱ्हाडेनं केलेली आजोबांच्या पैशांची चोरी; सांगितला किस्सा

मराठी मनोरंजनविश्वातील लोकप्रिय अभिनेता संकर्षण कऱ्हाडे आपल्या अभिनयासोबतच विनोदी स्वभावासाठीही ओळखला जातो. नाटक, मालिका, चित्रपट आणि सूत्रसंचालन अशा विविध माध्यमांतून त्याने प्रेक्षकांची मनं जिंकली आहेत. संकर्षण अनेकदा मुलाखतींमधून आपल्या आयुष्यातील मजेशीर आठवणी आणि किस्से सांगत असतो. असाच एक भन्नाट किस्सा त्याने बालपणीच्या आठवणींना उजाळा देताना सांगितला होता. विशेष म्हणजे, या किस्स्यात त्यानं वडिलांच्या एटीएममधून केलेल्या ३०० रुपयांच्या चोरीची आठवण सांगितली आहे.

संकर्षण कऱ्हाडेनं सांगितला किस्सा

संकर्षण कऱ्हाडे म्हणाला की, ‘नवीन नवीन एटीएम कार्ड आलं होतं. वडिलांच्या एटीएमचा पासवर्ड अख्या घरात फक्त मला माहित होता. म्हणजे बाबांना सुद्धा नाही मला माहित होता. नागपंचमीला माझे आजोबा माझ्या आईला हमखास साडी घ्यायचे. माझे आजोबा मला म्हणाले, मन्या जरा एटीएमला जा पैसे घेऊन ये. म्हटलं किती काढायचेत आजोबा? तर ते म्हणाले 500 काढ. मी म्हटलं ओके. मी गेलो एटीएममध्ये कार्ड घातलं. म्हटलं हीच ती संधी आहे. मी 300 काढले रिसिप्ट फाडून टाकली. 300 खिशात ठेवले. 500 काढले 500 ची रिसिप्ट घेतली घरी आलो. आजोबा 500 रुपये काढले. त्यांनी उषाला ठेवून दिले. मी म्हटलं चोरी मिटली. विषय संपला.’

‘संध्याकाळी बाबा आले घरी. बाबा आजोबांना म्हणाले, ‘बाबा तुम्ही आज 800 कसं काय काढले?’ हे ऐकल्यावर मला जो घाम फुटला होता. तो 300 चा घाम मी माझ्या मरेपर्यंत विसरू शकत नाही. मी ग्रॅज्युएशनला सुद्धा नव्हतो, मी अकरावी बारावीत असेन. आजोबा म्हणाले, नाही हो गिरीशराव, माझ्या बाबांना ते अहो जाओ म्हणायचे. त्यांना लक्षात आलं. ते बाबांना म्हणाले बरोबर आहे. तुम्ही जा आता, हात पाय धुऊन घ्या.’

‘बाबा आत गेल्यावर आजोबांनी अत्यंत घाणेरड्या शिवीनी मला हाक मारली, मला कळलं हे माझ्यासाठी आहे म्हणून. मग मी त्यांच्या जवळ गेलो. मला म्हणाले, साहेब 300 कुठे आहेत? म्हटलं, मी उडवले.मला म्हणले हरकत नाही. फक्त एटीएम मधून चोरी करताना आपला बाप त्याच बँकेमध्ये मॅनेजर आहे याच तर भान ठेवावा. माझे वडील त्याच बँकेत मॅनेजर. एवढी तर अक्कल कुठं, कशाचंच भान नव्हतं. ते म्हणाले, तुझेच पैसे आहेत तू 300 नाही 3000 काढ.’ न्यूज 18ला दिलेल्या मुलाखतीत संकर्षण कऱ्हाडे बोलत होता.