कुटुंब असूनही संतोष जुवेकर एकटा का राहतो? काय आहे नेमकं कारण?
संतोष जुवेकर यांच्या वैयक्तिक आयुष्यातील एका रहस्याचा अवधूत गुप्तेनं खुलासा केला आहे. कुटुंब असूनही संतोष एकटा का राहतो? त्याबद्दल अवधूतने एक लांबलचक पोस्ट केली आहे. त्याने या पोस्टमध्ये त्याच्या मित्राबद्दल अनेक गोष्टी शेअर केल्या आहेत तसेच. संतोषला होणाऱ्या ट्रोलिंगबद्दलही अवधूतने पोस्टमध्ये सडेतोड उत्तर दिलं आहे.
‘छावा’ चित्रपटानंतर अभिनेता संतोष जुवेकरला प्रचंड ट्रोल केलं जात आहे. ‘छावा’ या ऐतिहासिक चित्रपटात त्याने महत्त्वाची भूमिका साकारली आहे. छावामधील त्याच्या अभिनयाबद्दल तर सर्वांनी कौतुक केलं पण जेव्हा ‘छावा’च्या निमित्ताने त्याच्या काही मुलाखती झाल्या तेव्हा तो त्या मुलाखतींमध्ये चित्रपटाबद्दल किंवा अक्षय खन्नाबाबत जे काही बोलला त्यापैकी काही विधान त्याची एवढी व्हायरल झाली की त्याला ट्रोल करण्यात आलं. आणि ही ट्रोलिंग अजूनही सुरुच आहे.
वैयक्तिक आयुष्यातही संतोष तितकाच संघर्ष करतोय
एकीकडे संतोष जुवेकर ट्रोलिंगचा सामना करतोय तर दुसरीकडे वैयक्तिक आयुष्यातही संतोष तितकाच संघर्ष करत आहे. याबद्दल फारस कोणाला माहित नसेल. पण ,संतोष त्याच्या वैयक्तिक आयुष्याबद्दल फार काही बोलताना कधीही दिसत नाही. अनेकांना हे माहित नसेल की आई-वडील असून, त्याचे कुटुंब असून संतोष एकटा राहतो.
संतोष जुवेकरच्या एकटं राहण्याबद्दल काय म्हणाला अवधूत गुप्ते
पण त्याच्या एकटं राहण्याबद्दल अवधूत गुप्तेनेच खुलासा केला आहे. अवधूत गुप्ते आणि संतोष खूप चांगले मित्र आहेत हे सर्वांनाच माहित आहे. संतोष आणि अवधूत यांनी अनेक चित्रपट एकत्र केले आहेत. त्यामुळे त्यांची मैत्री घट्ट झाली आहे. संतोषच्या अभिनयासाठी घेतलेल्या मेहनतीबद्दल सांगताना अवधूत म्हणाला, “झेंडा’ चित्रपटात ‘संत्या’ची भूमिका जिवंत करण्यासाठी संपूर्ण शूटिंगदरम्यान तो चाळीत राहिला होता. ‘मोरया’च्या वेळीही त्याने असंच केलं. ‘एकतारा’ हा चित्रपट गायकाच्या आयुष्यावर आधारित असल्याने, त्या भूमिकेसाठी तो तब्बल एक वर्ष गिटार आणि गायन शिकत होता. त्याने माझ्या अनेक कार्यक्रमांना केवळ निरीक्षण करण्यासाठी हजेरी लावली होती.”
अवधूत पुढे म्हणाला, “इतर दिग्दर्शकांसोबत काम करतानाही संतोष तितकीच मेहनत घेतो. हीच जर त्याची अॅक्टिंग ‘मेथड’ असेल, तर आपण ती स्वीकारली पाहिजे. कारण त्याचा अभिनय निर्विवादपणे उत्कृष्ट असतो” असं म्हणत त्याने मित्राच्या मेहनतीचं कौतुक केलं.
View this post on Instagram
कुटुंब असतानाही एकटा का राहतो संतोष जुवेकर?
तसेच संतोष जुवेकर त्याचं कुटुंब असूनही वेगळा का राहतो? याबद्दलही अवधूतने त्याच्या पोस्टमध्ये सांगितलं आहे. त्याने सांगितलं की, “तो अभिनयासाठी इतका झपाटलेला आहे की तो आजही एकटाच राहतो. मात्र, तो आपल्या आई-वडिलांची आणि पुतणीची काळजी घेतो. अभिनयाच्या ह्याच वेडापाई संतोष आजही एकटा राहतो. अर्थात, एकटा राहत असून सुद्धा त्याच्या एकट्याचा संसार हा दृष्ट लागण्यासारखा आहे. त्याचं घर कधीही जाऊन बघा. एखाद्या गृहिणीलाही लाजवेल इतकं टापटीप असतं. एकटा राहूनही त्याचा संसार सुरळीत आहे. कुठल्याही मराठी अभिनेत्याप्रमाणे त्यालाही काटकसर करावी लागते. मात्र, त्याने कधी कुणाचे पैसे बुडवल्याचं किंवा नको ती देणी करून ठेवल्याचं ऐकिवात नाही.” असं म्हणत त्याने मित्राची बाजू घेतली.
ट्रोल करणाऱ्यांना अवधूत गुप्ते काय म्हणाला?
संतोष जुवेकरवर टीका करणाऱ्यांना अवधूत गुप्तेने चांगलेच खडे बोल सुनावले. तो म्हणाला, “संतोषने एखाद्या चित्रपटानंतर जरा अधिक श्रेय घ्यायचा प्रयत्न केला, तर लगेच त्याची खिल्ली उडवली जाते. मात्र, वर्षानुवर्षे संघर्ष करून यश मिळवल्यानंतर आनंद साजरा करणं हास्यास्पद नाही, तर ते त्याच्या मेहनतीचं फळ आहे.”
“कलाकारांच्या भावनांचा विचार न करता ट्रोलिंग…”
अवधूत गुप्ते म्हणतात, “ही फक्त संतोषची शोकांतिका नाही, तर अनेक मराठी कलाकारांची आहे. एखादा कलाकार वर्षभर मेहनत करून चित्रपट काढतो आणि रिलीज झाल्यानंतर दुसऱ्याच दिवशी लोक विचारतात, बाकी नवीन काय करतोयस? कलाकारांच्या भावनांचा विचार न करता केलेलं ट्रोलिंग म्हणजे फक्त क्रूर विनोद आहे. दगडावर उमलू पाहणाऱ्या फुलाचा संघर्ष कबरीवरच्या बुरशीला कधीच कळणार नाही” अशी खंतही अवधूतने व्यक्त केली आहे.
