Smit Machchhar : एका वेब सीरिजमुळे वाचले 174 प्रवाशांचे प्राण, स्मित मच्छार यांच्यासोबत असलेला फ्लायदुबईचा दुसरा हिरो कोण?

बुधवार, 30 सप्टेंबर रोजी फ्लायदुबईच्या FZ1073 विमानातील एक मोठा हवाई अपघात टाळणारे धाडसी पायलट कॅप्टन स्मित मच्छार यांचं सर्वत्र कौतुक होत आहे. दुबई ते तेल अवीव या विमान प्रवासादरम्यान ही धोकादायक घटना घडली, जेव्हा त्यांच्या सह-पायलटनं त्यांच्यावर हल्ला केला. त्यानं विमान पाडण्याचा प्रयत्न केला आणि कॅप्टनवर निर्घृणपणे चाकूनं वार केले, असा आरोप आहे.

प्रवाशांना मदत करण्यासाठी आपला जीव धोक्यात घातला

अतिशय वेदना आणि रक्तस्त्राव होत असूनही, कॅप्टन स्मित मच्छार यांनी सुरक्षा स्विचपर्यंत पोहोचून कॉकपिटचा दरवाजा उघडला. ते दरवाजाजवळच कोसळले आणि सुरुवातीला प्रवाशांनी दरवाजा उघडून आत जाण्यासाठी धडपड केली. पण, आत गेल्यावर, जखमी कॅप्टनची काळजी घेणाऱ्या सहप्रवाशांकडून त्यांना मदत मिळाली, ज्यात यानिव हायून नावाच्या एका इस्रायली प्लंबरचाही समावेश होता. यानिव्ह हायून यांनी परिस्थिती पटकन ओळखली आणि विमान नियंत्रणात आणण्यास मदत केली. त्यांनी या यशाचं श्रेय ‘मेडे’ या लोकप्रिय कॅनेडियन विमानचालन माहितीपटाला दिलं.

वृत्तानुसार, जखमी पायलटने आतून कॉकपिटचा दरवाजा उघडल्यानंतर इस्रायली प्रवासी यानिव हायून कॉकपिटमध्ये शिरले. कॅप्टनवरील हल्ल्यानंतर, फ्लायदुबईचे विमान FZ1073 प्रति मिनिट हजारो फूट वेगाने खाली येऊ लागले.

‘मेडे’ पाहिल्यामुळे यानिव हायून यांना विमानाची मुख्य नियंत्रणं ओळखण्यास मदत झाली. विमान सरळ करण्यासाठी त्यांनी कंट्रोल कॉलम मागे खेचला. एकदा नियंत्रण मिळवून विमान खाली पडण्यापासून वाचवल्यावर, त्यांनी परिस्थिती योग्यरीत्या हाताळली.

2003 मध्ये प्रसारित झालेली ‘मेडे’ ही माहितीपट वेब सीरिज विमान अपघात, थोडक्यात टळलेले अपघात, विमान अपहरण आणि बॉम्बस्फोटांच्या तपासावर आधारित आहे. या वेब सीरिजच्या दोन सीझनमध्ये अशा शेकडो घटना चित्रित करण्यात आल्या आहेत. ही सीरिज वीस वर्षांहून अधिक काळ टेलिव्हिजनवर सुरू आहे आणि वेगवेगळ्या देशांमध्ये ती वेगवेगळ्या नावांनी ओळखली जाते. कॅनडामध्ये, ती प्रामुख्याने ‘मेडे’ नावाने ओळखली जाते, तर यूके, युरोप, आशिया आणि ऑस्ट्रेलियामध्ये, ती नॅशनल जिओग्राफिकवर ‘एअर क्रॅश इन्व्हेस्टिगेशन’ (Air Crash Investigation) नावानं प्रसारित होते. अमेरिकेत, ती ‘एअर डिझास्टर्स’ (Air Disasters) आणि ‘एअर इमर्जन्सी’ (Air Emergency) या नावांनी ओळखली जाते.

सह-वैमानिकाने हल्ला केला होता का?

वैमानिक सौदी अरेबियातील तबूक येथील एका रुग्णालयात उपचार घेत आहेत. इस्रायली अधिकाऱ्यांच्या म्हणण्यानुसार, बुधवारी सह-वैमानिकानं हवेत असताना चाकूनं हल्ला करून 174 लोकांना घेऊन जाणारं विमान पाडण्याचा प्रयत्न केल्यानंतर त्यांचं विमान दुसऱ्या मार्गाने वळवण्यात आलं. इस्रायली अधिकाऱ्यांच्या म्हणण्यानुसार, स्मित रक्ताने माखलेल्या अवस्थेत कॉकपिटच्या जमिनीवर पडले होते, तेव्हा त्यांनी कॉकपिटचा दरवाजा उघडण्याचं बटण दाबलं. यामुळे प्रवासी आणि कर्मचाऱ्यांना सह-वैमानिकावर मात करणं शक्य झालं, तर प्रवासी म्हणून प्रवास करणाऱ्या फ्लायदुबईच्या दोन वैमानिकांनी विमान सुरक्षितपणे उतरवण्यास मदत केली.