Shabana Azmi: आमच्यात खूप भांडणं.., जावेद अख्तर यांच्यासोबतच्या वैवाहिक आयुष्याबद्दल शबाना आझमी स्पष्टच बोलल्या
Shabana Azmi : संसार कितीही दशकांचा असला तरी मतभेद, वाद आणि संघर्ष हे नात्याचा भाग असू शकतात; मात्र मैत्री, आदर आणि समजूतदारपणा नातं टिकवण्यासाठी महत्त्वाचा असतो, हे शबाना आझमी यांच्या या वक्तव्यामुळे अधोरेखित झालं आहे.
बॉलिवूडच्या दिग्गज अभिनेत्री शबाना आझमी आणि गीतकार जावेद अख्तर यांची जोडी इंडस्ट्रीतील चर्चेत असलेल्या जोड्यांपैकी एक आहे. दोघांच्या लग्नाला चार दशकांहून अधिक काळ झाला आहे. मात्र, इतक्या वर्षांच्या संसारानंतरही त्यांचं नातं कायम ‘परफेक्ट’ राहिलेलं नाही, हे स्वतः शबाना आझमी यांनी स्पष्ट केलं आहे. नुकत्याच दिलेल्या एका मुलाखतीत त्यांनी त्यांच्या वैवाहिक आयुष्याबाबत मोकळेपणाने भाष्य केलं. जावेद अख्तर यांच्या पहिल्या पत्नी हनी इराणी यांच्यासोबतच्या नात्यावरही शबाना यांनी भाष्य केलं आहे.
‘झूम’ला दिलेल्या मुलाखतीत शबाना आझमी यांनी जावेद अख्तर यांच्यासोबतच्या नात्याबद्दल बोलताना सांगितलं की, त्यांचा संसार नेहमीच सुरळीत राहिलेला नाही. दोघांमध्ये अनेकदा मोठे वाद होतात. मात्र, त्यांच्या नात्याची सर्वात मजबूत बाजू म्हणजे मैत्री आणि जगाकडे पाहण्याचा समान दृष्टिकोन. शबाना यांच्या मते, जावेद यांच्यासोबत त्यांची मैत्री खूप मजबूत आहे. जावेद यांची बुद्धिमत्ता, विनोदबुद्धी आणि लोकांशी संवाद साधण्याची पद्धत त्यांना विशेष आवडते. त्या जावेद यांचा खूप आदर करतात.
शबाना यांनी जावेद यांच्याकडे आकर्षित होण्यामागचं कारणही सांगितलं. त्यांच्या मते, जावेद हे त्यांना भेटलेल्या सर्वात बुद्धिमान व्यक्तींपैकी एक आहेत. विशेष म्हणजे जावेद यांच्यात त्यांना स्वतःच्या वडिलांची झलक दिसली. दोघांच्या कौटुंबिक पार्श्वभूमीतही काही साम्य असल्याचं शबाना यांनी सांगितलं. दोघांचेही पालक लेखक होते आणि त्यांचा साहित्याशी जवळचा संबंध होता. उर्दू शायरीची आवडही दोघांना होती. त्यामुळे विचारांची जवळीक त्यांच्या नात्यासाठी महत्त्वाची ठरली.
जावेद अख्तर यांच्या पहिल्या पत्नीबद्दल काय म्हणाल्या?
जावेद अख्तर यांच्या पहिल्या पत्नी हनी इराणी यांच्याबद्दलही शबाना यांनी मनमोकळेपणाने सांगितलं. जावेद आणि हनी यांना फरहान आणि झोया ही दोन मुलं आहेत. जावेद यांच्यासोबत शबाना यांच्या नात्याला सुरुवातीला मोठ्या टीकेला सामोरं जावं लागलं होतं. शबाना यांच्या मते, त्या काळात हनी इराणी यांनी अतिशय समजूतदारपणा दाखवला. त्यांनी मुलांच्या मनात शबाना यांच्याबद्दल कधीही द्वेष निर्माण केला नाही किंवा मुलांसमोर जावेद यांची वाईट प्रतिमा निर्माण करण्याचा प्रयत्न केला नाही. त्यामुळे आज हनी इराणी त्यांच्यासाठी कुटुंबातील सदस्यासारख्या आहेत आणि दोघींमध्ये चांगलं नातं आहे. विशेष म्हणजे हनी इराणी यांनीही यापूर्वी जावेद आणि शबाना यांच्याबद्दल आदर व्यक्त केला आहे. विभक्त झाल्यानंतर मनात कटुता ठेवण्यात अर्थ नसल्याचं त्यांनी म्हटलं होतं.
