युट्यूबवर 503 मिलियन व्ह्यूज, तरी तशा प्रकारचं गाणं पुन्हा कधीच न गाण्याचा श्रेया घोषालचा निर्णय

बॉलिवूड चित्रपटांमध्ये अशी अनेक गाणी आहेत, ज्याचे बोल महिलांना फक्त उपभोगाची वस्तू असल्याच्या दृष्टीकोनातून लिहिले गेले आहेत. यात विशेषकरून आयटम साँग्सचा समावेश होतो. हे आयटम साँग खूप गाजतात आणि त्यांना प्रत्येक पार्ट्यांमध्ये, लग्नामध्ये, डीजेमध्ये वाजवलं जातं. असंच एक गाणं 2012 मध्ये प्रदर्शित झालेल्या ‘अग्निपथ’ या चित्रपटात होतं. ‘चिकनी चमेली’ या गाण्यावर अभिनेत्री कतरिना कैफ थिरकली होती आणि प्रसिद्ध पार्श्वगायिका श्रेया घोषालच्या आवाजात ते रेकॉर्ड करण्यात आलं होतं. आता नुकत्याच दिलेल्या एका मुलाखतीत श्रेया अशा गाण्यांविषयी मोकळेपणे व्यक्त झाली असून भविष्यात अशी गाणी गाणार नसल्याचं जाहीर केलं.

राज शमानीच्या पॉडकास्टमध्ये श्रेयाने सांगितलं की ‘चिकनी चमेली’नंतर तिला त्याच प्रकारच्या अनेक गाण्यांचे ऑफर्स येऊ लागले होते. या गाण्यांमध्ये महिलांना फक्त उपभोगाच्या वस्तूप्रमाणे दाखवण्यात येणार होतं. “माझ्या एका संगीतकार मित्रानेच मला अशा एका गाण्याची ऑफर दिली होती, ज्याचे बोल अत्यंत आक्षेपार्ह आणि अश्लील होते. मला फक्त त्या शब्दांबद्दल विचार करूनच लाज वाटली आणि लगेचच मी त्या गाण्याला नकार दिला. गाण्याचे बोल अत्यंत महत्त्वपूर्ण असतात आणि ही कलाकाराचीच जबाबदारी असते की त्यांनी विचारपूर्वक काम करावं”, असं श्रेया म्हणाली.

‘चिकनी चमेली’ या गाण्याबाबत श्रेयाने कबुली दिली की त्यावेळी तिला त्या ओळींचा अर्थ नीट समजला नव्हता. त्यावेळी मी इतकी हुशार नव्हते की मला त्या ओळींमागील अर्थ समजू शकेल, हे तिने मान्य केलं. याविषयी ती पुढे म्हणाली, “मी हेसुद्धा मान्य करते की या गाण्यात संगीत आणि प्रस्तुतीचीही तेवढीच कला आहे. जेव्हा एखादं गाणं सुपरहिट होतं, तेव्हा कॉन्सर्टमध्ये ते वारंवार गायला लागतं. अनेकदा लहान मुलांसमोर अशी गाणी गाताना संकोचलेपणा जाणवतो. मी चिकनी चमेली गाणं अनेकदा परफॉर्म केलंय. परंतु यापुढे अशा प्रकारचं गाणं मी रेकॉर्ड करणार नाही, ज्याचे बोल महिलांच्या दृष्टीकोनातून चुकीचे लिहिले आहेत. यापुढे मी कशा प्रकारची गाणी गातेय, याबाबत अधिक सजग राहीन.”