Kangana Ranaut: कंगना यांनी ‘बी-ग्रेड’ म्हटलं, आता तापसी पन्नूने सोडलं मौन; दिलं सडेतोड उत्तर

अभिनेत्री तापसी पन्नू आणि कंगना राणौत यांच्यातील वादाची चर्चा अनेक वर्षांपासून सुरू आहे. दोघींनीही या प्रकरणावर वेगवेगळ्या वेळी प्रतिक्रिया दिल्या आहेत. आता बऱ्याच वर्षांनंतर तापसीने पुन्हा एकदा या जुन्या वादावर भाष्य केलं आहे. तापसीने या संपूर्ण प्रकरणाकडे वेगळ्या दृष्टीकोनातून पाहत असल्याचं स्पष्ट केलं. तापसी नुकतीच ‘इंडिया टुडे वुमन समिट 2026’मध्ये सहभागी झाली होती. यावेळी तिला अभिनेत्री आणि खासदार कंगना यांच्यासोबतचे संबंध आता सुधारले आहेत का, असा प्रश्न विचारण्यात आलं. यावर तापसीने मिश्कील अंदाजात उत्तर दिलं.

काय म्हणाली तापसी?

तापसीच्या म्हणण्यानुसार, या कथित वादाची चर्चा सुरू होण्यापूर्वीही ती कंगना यांना भेटली नव्हती आणि वादानंतरही दोघींची प्रत्यक्ष भेट झाली नाही. “आता तर खूप जणी आहेत, तुम्ही कोणाबद्दल बोलत आहात? मी त्यांना भेटलेले नाही. जेव्हा हा कथित वाद सुरू झाला, तेव्हाही मी त्यांना भेटले नव्हते. मी त्यांना आताही भेटलेले नाही. त्यांच्याबद्दलचं माझं मत हे माझ्या संगोपनातून, माझ्या बोलण्याच्या पद्धतीतून, गोष्टींकडे पाहण्याच्या माझ्या दृष्टीकोनातून आणि त्यांच्या दृष्टीकोनातून दिसून येतं. त्या त्यांच्या दृष्टीकोनावर ठामर आहेत. त्यामुळे प्रत्येकाची भूमिका काय आहे, हे प्रत्येकाने पाहून ठरवणं पुरेसं आहे, असं मला वाटतं”, असं तापसीने स्पष्ट केलं.

कुठून सुरू झाला होता वाद?

तापसी आणि कंगना यांच्यातील वादाची सुरुवात 2019 मध्ये झाल्याचं म्हटलं जातं. तापसीने कंगना यांच्या ‘जजमेंटल है क्या’ या चित्रपटाच्या ट्रेलरचं कौतुक केलं होतं, मात्र त्यावेळी तिने मुख्य भूमिका साकारलेल्या कंगना यांचंच नाव घेतलं नव्हतं. त्यामुळे कंगना यांची बहीण रंगोली चंडेलने तापसीवर निशाणा साधत तिला ‘सस्ती कॉपी’ असं म्हटलं होतं. त्यानंतर सोशल मीडियावर दोघींच्या वादाची चर्चा सुरू झाली. 2020 मध्ये बॉलिवूडमधील नेपोटिझम आणि आऊटसायडर्स या मुद्द्यावर चर्चा पेटल्यानंतर हे प्रकरण आणखी वाढलं. त्यावेळी कंगना यांनी तापसीसह काही अभिनेत्रींबाबत कठोर शब्दांचा वापर केला होता. तर दुसरीकडे तापसीने कंगना यांच्याविरोधात वैयक्तिक टीका केली नसल्याचं अनेकदा सांगितलं आहे.