सुशांतकडून टॅलेंट मॅनेजर जया साहाच्या खात्यात 10 कोटी, ईडीकडून कसून चौकशी

जया साहा ही सुशांतकडे वर्षभरापासून टॅलेंट मॅनेजर म्हणून काम पाहत होती. त्याला चित्रपट व जाहिरातीचे काम मिळवून देण्यासाठी प्रयत्न करण्याची जबाबदारी तिच्यावर होती.

Anish Bendre | Updated on: Aug 28, 2020 | 7:52 AM

मुंबई : अभिनेता सुशांत सिंह राजपूतची टॅलेंट मॅनेजर जया साहा हिला सुशांतकडून 10 कोटी रुपये मिळाल्याचे ईडीच्या चौकशीत समोर आले आहे. जाहिरातीच्या कमिशनपोटी ही रक्कम घेतल्याचा दावा तिने केला असला तरी एवढी मोठी रक्कम असल्याने तपास यंत्रणा चक्रावल्या आहेत. (Talent Manager Jaya Saha quizzed by ED for getting 10 Crore from Sushant Singh Rajput)

जया साहा ही सुशांतकडे वर्षभरापासून टॅलेंट मॅनेजर म्हणून काम पाहत होती. त्याला चित्रपट व जाहिरातीचे काम मिळवून देण्यासाठी प्रयत्न करण्याची जबाबदारी तिच्यावर होती.

आधी दिशा सालियन हे काम सुशांतसाठी करत होती, तिने काम सोडल्यावर जयाने या कालावधीत सुशांतकडून 10 कोटी रुपये कमावले असल्याचे बँक अकाउंटवरुन स्पष्ट झाले. अधिकाऱ्यांनी त्याबाबत विचारले असता आपण ही रक्कम जाहिरातींचे कमिशन म्हणून घेतल्याचे जयाने सांगितले.

सहसा या कामासाठी कलाकारांना मिळणाऱ्या मानधनाच्या 3 ते 5 टक्के रक्कम कमिशन म्हणून घेतली जाते. त्यामुळे सुशांतने गेल्या वर्षभरात किती जाहिराती केल्या, याचा सविस्तर तपशील तिच्याकडून मागवण्यात आला आहे.

सुशांतने जयाला 10 टक्के कमिशन दिले, असे गृहित धरले तरी त्यासाठी एका वर्षात सुशांतने 100 कोटीपर्यंत मानधन मिळवून देणाऱ्या जाहिराती केल्या पाहिजेत. मात्र, तितकी त्याची मिळकत नसल्याची माहिती आहे. त्यामुळे जया हिने 10 कोटी का घेतले? याबाबत चौकशी केली जात असल्याचे अधिकाऱ्यांचे म्हणणे आहे.

दुसरीकडे, अभिनेता सुशांत सिंह राजपूत मृत्यू प्रकरणी सीबीआयकडून काल दिवसभर चौकशीसत्र सुरु आहे.

सीबीआयकडून कोणाची किती तास चौकशी?

1) सिद्धार्थ पिठानी (मित्र)- सकाळी 9 वाजता DRDO गेस्ट हाऊसवर दाखल. CBI अधिकाऱ्यांकडून जवळपास 15 तास चौकशी झाल्यानंतर रात्री बाहेर पडला.

2) नीरज सिंह (स्वयंपाकी) – सकाळी 10 वाजताच्या सुमारास DRDO गेस्ट हाऊसवर दाखल. CBI अधिकाऱ्यांकडून जवळपास 14 तास चौकशी झाल्यानंतर रात्री बाहेर.

3) केशव बचनेर (स्वयंपाकी) – सकाळी 10 वाजताच्या सुमारास DRDO गेस्ट हाऊसवर. CBI अधिकाऱ्यांकडून जवळपास 14 तास चौकशी झाल्यानंतर रात्री बाहेर पडला.

4) रजत मेवाती (सीए) – सकाळी 10 वाजता DRDO गेस्ट हाऊसवर दाखल. CBI अधिकाऱ्यांकडून सुमारे 14 तास चौकशी.

5) शोविक चक्रवर्ती (रियाचा भाऊ) – सकाळी 10 वाजता DRDO गेस्ट हाऊसवर दाखल. CBI अधिकाऱ्यांकडून सुमारे 14 तास चौकशी.