पहाटे 6 चे शोज, 1 लाखांहून अधिक तिकिटांची विक्री; या चित्रपटाची तुफान क्रेझ, ‘धुरंधर 2’चाही मोडणार रेकॉर्ड?
या चित्रपटाची भारतात तुफान क्रेझ आहे. जगातल्या सर्वोत्कृष्ट दिग्दर्शकांमध्ये या चित्रपटाच्या दिग्दर्शकाचा समावेश होतो. पहिल्याच दिवशी या चित्रपटाच्या लाखो तिकिटांची विक्री झाली आहे. त्यामुळे बॉक्स ऑफिसवर हा बरेच रेकॉर्ड मोडणार, असा अंदाज आहे.
जगातील टॉपच्या चित्रपट दिग्दर्शकांमध्ये गणल्या जाणाऱ्या ख्रिस्तोफर नोलन यांचा बहुचर्चित आणि बहुप्रतिक्षित ‘द ओडिसी’ हा चित्रपट आज (17 जून 2026) जगभरात प्रदर्शित झाला आहे. भारतातही या चित्रपटाचा प्रेक्षकवर्ग खूप मोठा आहे., कारण स्वत: ख्रिस्तोफर नोलन यांनी चित्रपटातील कलाकारांसोबत भारतात येऊन चित्रपटाचं प्रमोशन केलं होतं. नोलन यांच्या मागच्या ‘ओपनहायमर’ या चित्रपटाने भारतात 150 कोटी रुपयांहून अधिक गल्ला जमवला होता. त्याआधीही त्यांचे चित्रपट भारतात लोकप्रिय ठरले होते. ‘द ओडिसी’ची भारतात जबरदस्त अॅडव्हान्स बुकिंग झाली असून पहिल्याच दिवशी धमाकेदार कमाई होण्याची शक्यता वर्तवण्यात येत आहे.
ख्रिस्तोफर नोलन यांच्या या चित्रपटासाठी भारतात अत्यंत सकारात्मकरित्या बुकिंगला सुरुवात झाली आहे. आयमॅक्स फॉरमॅटमधील तिकिटं सुरुवातीपासूनच अत्यंत जलद गतीने बुक होत आहेत. ‘द ओडिसी’च्या ट्रेलरमध्ये दमदार व्हिज्युअल्स पहायला मिळाले. त्यामुळे मोठ्या पडद्यावर त्याचा अनुभव अत्यंत चांगल्याप्रकारे घेता यावा यासाठी आयमॅक्स फॉरमॅटला प्रेक्षकांकडून सर्वाधिक पसंती मिळतेय. दिल्ली, मुंबई आणि पुणे यांसारख्या शहरांमध्ये पहाटे 6 वाजल्यापासूनच ‘द ओडिसी’चे शोज सुरू झाले आहेत. ‘सॅकनिक्ल’ने दिलेल्या रिपोर्टनुसार, भारतात फक्त 34 आयमॅक्स स्क्रीन्सवर ‘द ओडिसी’चे तब्बल 91000 हून अधिक तिकिटं विकली गेली आहेत. या बुकिंगमधून 9.5 कोटी रुपयांचं कलेक्शन आधीच झालं आहे.
पहा ट्रेलर-
‘बॉलिवूड हंगामा’ने दिलेल्या माहितीनुसार, फक्त ओपनिंग डेलाच म्हणजेच शुक्रवारसाठी ‘द ओडिसी’चे 1.25 लाखांहून अधिक तिकिटं विकली गेली आहेत. म्हणजेच या चित्रपटाचं एकूण कलेक्शन हे दहा कोटी रुपयांहून अधिक होणार असल्याचा अंदाज आहे. अॅडव्हान्स बुकिंग आणि पहिल्या दिवसाची गर्दी हे दोन्ही मिळून ‘द ओडिसी’ची भारतातील ओपनिंग ही 20 कोटी रुपयांहून अधिक झाल्यास नवल वाटण्याचं काही कारण नाही.
2026 मधील सर्वांत मोठ्या बॉलिवूड ओपनिंग्सच्या तुलनेत या आकड्याकडे दुर्लक्ष करता येणार आहे. यावर्षी फक्त दोनच चित्रपट हे पहिल्या दिवशी 20 कोटी रुपयांपेक्षा अधिक कमाई करू शकले. यामध्ये ‘धुरंधर 2’ (90 कोटी रुपये), ‘बॉर्डर 2’ (32 कोटी रुपये) यांचा समावेश आहे. अक्षय कुमारचा ‘भूत बंगला’ आणि ‘वेलकम टू द जंगल’ किंवा अजय देवगणचा ‘धमाल 4’, शाहिद कपूरचा ‘कॉकटेल 2’ यांसारखे चित्रपटसुद्धा पहिल्या दिवशी 20 कोटी रुपयांपेक्षा अधिक कमाई करू शकले नाहीत.
