21 वर्षीय मुलाचा पिता अरबाज खान दुसऱ्यांदा चढणार बोहल्यावर; कोण आहे होणारी पत्नी?

मुंबई : 22 डिसेंबर 2023 | अभिनेता आणि निर्माता अरबाज खान लवकरच लग्नबंधनात अडकणार आहे. येत्या 24 डिसेंबर रोजी अरबाज दुसऱ्यांदा लग्नगाठ बांधणार आहे. मेकअप आर्टिस्ट शुरा खानला तो डेट करत असल्याची जोरदार चर्चा आहे. या दोघांनी उर्वरित आयुष्य एकमेकांसोबत व्यतीत करण्याचा निर्णय घेतला आहे. 56 वर्षीय अरबाज हा गेल्या काही वर्षांपासून मॉडेल जॉर्जिया अँड्रियानीला डेट करत होता. मात्र काही दिवसांपूर्वीच जॉर्जियाने एका मुलाखतीत अरबाजशी ब्रेकअप झाल्याचा खुलासा केला. त्यानंतर आता अरबाजच्या लग्नाची बातमी समोर येत आहे. अरबाज कोणाशी लग्न करणार आहे, ती मेकअप आर्टिस्ट नेमकी कोण आहे याबद्दल जाणून घेण्यासाठी नेटकरी उत्सुक आहेत.

कोण आहे शुरा खान?

शुरा खान ही बॉलिवूडमधील प्रसिद्ध मेकअप आर्टिस्ट आहे. तिचा इन्स्टाग्राम अकाऊंट प्रायव्हेट असून तिचे 13.2 हजार फॉलोअर्स आहेत. शुराने अभिनेत्री रवीना टंडन आणि तिची मुलगी राशा थडानीसाठी मेकअप आर्टिस्ट म्हणून काम केलंय. अरबाज आणि शुराची पहिली भेट ‘पटना शुक्ला’ या चित्रपटाच्या सेटवर झाली.

56 वर्षीय अरबाजने याआधी अभिनेत्री मलायका अरोराशी लग्न केलं होतं. या दोघांना एक मुलगासुद्धा आहे. मात्र लग्नाच्या बऱ्याच वर्षांनंतर अरबाज आणि मलायकाने 2016 मध्ये घटस्फोटासाठी अर्ज केला आणि 2017 मध्ये दोघं विभक्त झाले. 1998 मध्ये अरबाज आणि मलायकाने लग्न केलं होतं. लग्नाच्या 19 वर्षांनंतर दोघांचे मार्ग वेगळे झाले. अरबाज आणि मलायाकाचा मुलगा अरहान खान हा आता 21 वर्षांचा आहे.

मलायकाला घटस्फोट दिल्यानंतर अरबाज हा मॉडेल जॉर्जियाला डेट करू लागला होता. तर मलायका सध्या अभिनेता अर्जुन कपूरला डेट करतेय. जॉर्जियाने काही दिवसांपूर्वी दिलेल्या एका मुलाखतीत अरबाजच्या ब्रेकअपचा खुलासा केला होता. “तो माझा सर्वोत्कृष्ट मित्र आहे आणि माझ्या मनात त्याच्याविषयी नेहमीच भावना असतील. मलायकासोबतचं त्याचं नातं कधीच आमच्या नात्यात अडथळा ठरला नव्हता. पण अरबाजची एक्स गर्लफ्रेंड म्हणून माझी ओळख करून दिली तर मला खूप वाईट वाटतं. मला अपमानित केल्यासारखं वाटतं”, असं जॉर्जिया म्हणाली होती.