काय आहे Ramsay Hunt Syndrome, ज्यानं जगप्रसिद्ध गायक जस्टीन बिबरच्या चेहऱ्याचा आकारच बदलला

जगभरातील तरुणाईला आपल्या आवाजाने भुरळ घालणारा पॉप सिंगर जस्टिन बीबरवर (Justin Bieber) मोठे संकट कोसळले आहे. त्याला एका विषाणूमुळे गंभीर आजाराचा सामना करावा लागत आहे. या आजाराबाबत खुद्द जस्टिननेच आपल्या इंस्टावर एक व्हिडिओ (Video) पोस्ट करुन माहिती दिली आहे. आजारपणामुळे जस्टिन बीबरने या आठवड्यात आपले अनेक ‘शो’ रद्द केले आहेत. यात, टोरंटोमधील दोन शोज्‌चा समावेश आहे. जस्टिनने आपल्या इंस्टाग्रामवर सांगितले, की त्याला रॅमसे हंट सिंड्रोमचे (Ramsay Hunt syndrome) निदान झाले आहे, हा एक विषाणू असून ज्यामुळे त्याच्या चेहऱ्याची उजवी बाजू तात्पुरती पॅरालाइज्ड झाली आहे.

काय आहे हा आजार?

न्यू यॉर्कच्या माउंट सिनाई हेल्थ सिस्टमच्या रिसोर्सनुसार, रॅमसे हंट सिंड्रोम हा एक ‘पेनफुल रॅश’चा प्रकार आहे हा आजार बहुतेक प्रौढांमध्ये दिसून येतो. या आजारामध्ये व्हॅरिसेला झोस्टर विषाणू डोक्यातील मज्जातंतूला संक्रमित करतो व त्यामुळे हा आजार निर्माण होत असतो. हाच विषाणू कांजण्या आणि शिंगल्सलाही कारणीभूत ठरतो. क्वचित प्रसंगी मुलांमध्ये हा सिंड्रोम दिसून येतो.

View this post on Instagram

A post shared by Justin Bieber (@justinbieber)

रॅमसे हंट सिंड्रोम कशामुळे होतो?

व्हॅरिसेला विषाणू हा आतील कानाजवळील चेहऱ्याच्या मज्जातंतूला संक्रमित करतो, ज्यामुळे त्या भागाला सूज येते. बीबरने इंस्टाग्रामवर पोस्ट केलेल्या एका व्हिडिओमध्ये चाहत्यांना सांगितले आहे, की हा सिंड्रोम आपल्या कानाच्या मज्जातंतूवर, चेहऱ्याच्या मज्जातंतूवर हल्ला करणाऱ्या विषाणुंमुळे पसरला आहे. व त्यामुळे आपला चेहरा पॅरालाइज्ड झाला आहे.

काय आहेत लक्षणे?

न्यूयॉर्कच्या माउंट सिनाई हेल्थ सिस्टम रिसोर्सच्या माहितीनुसार,

1. कानात तीव्र वेदना होणे.

2. कानाचा पडदा, जीभ आणि तोंडाच्या वरील भागात वेदनांसह रॅश निर्माण होणे.

3. एकीकडील ऐकण्याची क्षमता कमी होणे.

4. एखाद्या गोष्टींच्या संवेदना (व्हर्टिगो) होणे.

5. चेहऱ्याच्या एका बाजूला कमकुवतपणा निर्माण होउन त्यामुळे एक डोळा बंद करणे, खाणे, हावभाव करणे आणि चेहऱ्याची बारीक हालचाल करणे कठीण होते.

काय दिसतेय व्हिडिओत

बीबरने आपल्या इंस्टा अकाउंटवर एक व्हिडिओ शेअर केला आहे. त्यात बीबरच्या आजाराची लक्षणे स्पष्ट दिसून येत आहेत. त्याला उजवा डोळा लुकलुकता येत नव्हता. बीबर चेहऱ्याच्या उजव्या बाजूला हसू शकत नाही किंवा नाक हलवू शकत नाही. त्याचे चेहर्याच्या दोन्ही बाजूंच्या हालचालींमध्ये बदल जाणवत आहेत.

रॅमसे हंट सिंड्रोमवर उपचार काय?

न्यूयॉर्कच्या माउंट सिनाई हेल्थ सिस्टम रिसोर्सने म्हटले आहे, की स्टिरॉइड्स प्रकारातील अँटी-इंफ्लेमेंटरी औषधे सामान्यतः रॅमसे हंट सिंड्रोमवर उपचार करण्यासाठी दिली जातात. त्यासोबतच अँटीव्हायरल औषधे दिली जाऊ शकतात. एकंदरीत, लक्षणे दिसू लागल्यानंतर तीन दिवसांत उपचार सुरू केल्यास बरे होण्याची शक्यता अधिक असते. बीबरची लक्षणे कधीपासून सुरू झाली हे अद्याप कळलेले नाही. या वेळेत उपचार सुरू केल्यावर, बहुतेक लोक पूर्ण बरे होतात. उपचारांना तीन दिवसांपेक्षा जास्त उशीर झाल्यास, पूर्ण बरे होण्याची शक्यता कमी असते. माउंट सिनाईच्या आरोग्य संसाधनानुसार, स्टिरॉइड्स घेऊनही वेदना होत राहिल्यास कधीकधी हार्ड पेनकिलर औषधांची देखील आवश्यकता असते. चेहऱ्याचे स्नायू कमकुवत असताना कॉर्नियाला दुखापत होऊ नये म्हणून काहीवेळा डोळा पॅच घालण्याची शिफारस केली जाते.