लहान मुले असलेल्या घरात आवर्जून लावा ही 5 झाडे; प्रख्यात बालरोगतज्ज्ञांनी सांगितले आरोग्यदायी फायदे

लहान मुलांची रोगप्रतिकारक शक्ती वाढवण्यासाठी आणि घरातील वातावरण आनंदी ठेवण्यासाठी झाडे महत्त्वाची भूमिका बजावतात. बालरोगतज्ज्ञांच्या मते, विशिष्ट वनस्पती घरातील हानिकारक वायू शोषून घेतात आणि शुद्ध ऑक्सिजन देतात. 5 सोपे इनडोअर प्लांट्स मुलांचे आरोग्य सुधारण्यास कशी मदत करतात, हे सांगितले आहे.

घरामध्ये लहान मुले असतील तर त्यांच्या आरोग्याची आणि सुरक्षिततेची काळजी घेणे पालकांसाठी सर्वात मोठे आव्हान असते. आजकाल मुले जास्तीत जास्त वेळ घरात घालवतात, ज्यामुळे घरातील हवेची गुणवत्ता थेट त्यांच्या आरोग्यावर परिणाम करते. या समस्येवर उपाय म्हणून प्रख्यात बालरोगतज्ज्ञ डॉ. अर्पित गुप्ता यांनी त्यांच्या अधिकृत इंस्टाग्राम हँडलवर एक विशेष व्हिडिओ शेअर केला आहे. यामध्ये त्यांनी लहान मुले असलेल्या घरांमध्ये 5 विशिष्ट इनडोअर प्लांट्स ठेवण्याचा सल्ला दिला असून त्याचे फायदे सांगितले आहेत.

1. स्पायडर प्लांट

डॉ. अर्पित गुप्ता यांच्या मते, लहान मुलांच्या खोलीत ठेवण्यासाठी स्पायडर प्लांट हा सर्वोत्तम पर्याय आहे. हे झाड कार्बन मोनॉक्साइड, फॉर्मल्डिहाइड आणि बेंझिन यांसारखे घरातील हानिकारक वायू शोषून घेण्यास अत्यंत प्रभावी आहे. सर्वात महत्त्वाची गोष्ट म्हणजे हे झाड पूर्णपणे नॉन-टॉक्सिक (बिगरविषारी) आहे. त्यामुळे खेळताना लहान मुलांनी किंवा पाळीव प्राण्यांनी याची पाने तोंडात टाकली, तरी त्यांच्या आरोग्याला कोणताही धोका पोहोचत नाही.

2. ऐरेका पाम

घरातील हवा कोरडी पडल्यास लहान मुलांना खोकला, घशात खवखव किंवा त्वचेची ऍलर्जी यांसारख्या समस्या उद्भवू शकतात. ऐरेका पाम हे झाड एक उत्तम नैसर्गिक ह्युमिडिफायर म्हणून काम करते. हे हवेतील ओलावा टिकवून ठेवते, ज्यामुळे मुलांना श्वसनाचा त्रास होत नाही. तसेच हे झाड दिसायला अत्यंत सुंदर असल्याने घरातील वातावरण प्रसन्न आणि सकारात्मक ठेवण्यास मदत करते.

3. स्नेक प्लांट

बहुतांश झाडे रात्रीच्या वेळी कार्बन डायऑक्साइड सोडतात, मात्र स्नेक प्लांट हे याला अपवाद आहे. हे झाड रात्रीच्या वेळीही मोठ्या प्रमाणावर शुद्ध ऑक्सिजन हवेत सोडते. त्यामुळे मुलांच्या बेडरूममध्ये हे झाड ठेवल्यास त्यांना रात्रीच्या वेळी शुद्ध हवा मिळते आणि त्यांची झोप सुधारेल. या झाडाला अत्यंत कमी सूर्यप्रकाश आणि कमी पाण्याची गरज असल्याने याची काळजी घेणे देखील खूप सोपे आहे.

4. कोरफड

कोरफड हे केवळ हवा शुद्ध करणारे झाड नाही, तर ते औषधी गुणांनी समृद्ध आहे. हे हवेतील रासायनिक कण शोषून घेते आणि घरातील हवेची पातळी खालावल्यास या झाडाच्या पानांवर तपकिरी डाग पडतात, ज्यामुळे पालकांना घरातील हवेच्या गुणवत्तेचा अंदाज येतो. याशिवाय लहान मुलांना किरकोळ खरचटल्यास, डास चावल्यास किंवा त्वचेवर पुरळ आल्यास कोरफडीचे ताजे जेल लावल्याने त्वरित आराम मिळतो.

5. पीस लिली

पीस लिली हे झाड घरातील हवेतील विषारी घटक नष्ट करण्यासोबतच हवेतील आर्द्रतेमुळे निर्माण होणारी बुरशी (Mold Spores) नष्ट करण्याचे काम करते. ज्या मुलांना धुळीची किंवा दम्याची ऍलर्जी आहे, त्यांच्यासाठी हे झाड वरदान ठरू शकते. या झाडाला येणारी पांढरी फुले मुलांचे मन शांत ठेवण्यास आणि घरातील मानसिक ताण कमी करण्यास मदत करतात.

डॉ. अर्पित गुप्ता यांनी सुचवलेले हे 5 वनस्पती आपल्या घरात लावून तुम्ही मुलांना एक निरोगी, शुद्ध आणि सुरक्षित वातावरण देऊ शकता.

(डिस्क्लेमर: या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)