Madhuri dixit Husband dr Shriram Nene : वय वाढलं तरी गुडघे मजबूत ठेवण्यासाठी माधुरी दीक्षितच्या नवऱ्याचा खास सल्ला, आजपासूनच बदला ‘या’ सवयी
Madhuri dixit Husband dr Shriram Nene : गुडघे निरोगी आणि मजबूत ठेवण्यासाठी नेमकं काय करायला हवं? माधुरी दीक्षितचे पती डॉ. श्रीराम नेने यांनी यासाठी काही सोप्या सवयी सांगितल्या आहेत. या सवयी रोजच्या आयुष्यात उपयोगी ठरू शकतात.
वय वाढत असताना शरीराच्या आरोग्याची काळजी घेणे जितके महत्त्वाचे आहे, तितकेच गुडघ्यांकडे लक्ष देणेही गरजेचे आहे. चालताना, जिने चढताना, खाली वाकताना किंवा साधे उठताना-बसतानाही गुडघ्यांवर मोठा ताण येतो. त्यामुळे गुडघ्यांमध्ये वारंवार दुखणे, जडपणा किंवा सूज जाणवू लागल्यास दैनंदिन जीवनातील अनेक कामांवर परिणाम होऊ शकतो. मात्र, गुडघेदुखी सुरू झाल्यानंतरच त्यावर उपाय करण्याऐवजी आधीपासूनच काही सवयी अंगीकारल्यास गुडघ्यांचे आरोग्य चांगले राखण्यास मदत होऊ शकते. माधुरी दीक्षितचे पती आणि हृदय व छातीचे शल्यचिकित्सक डॉ. श्रीराम नेने यांनी गुडघे आणि सांधे मजबूत ठेवण्यासाठी काही महत्त्वाच्या गोष्टी सांगितल्या आहेत.
गुडघे निरोगी ठेवण्यासाठी नियमित हालचाल करणे महत्त्वाचे आहे. गुडघे दुखतात म्हणून हालचाल पूर्णपणे बंद करण्याऐवजी आपल्या क्षमतेनुसार चालणे किंवा हलका व्यायाम करणे फायदेशीर ठरू शकते. नियमित हालचालींमुळे शरीर सक्रिय राहण्यास मदत होते. मात्र, अचानक जास्त किंवा कठीण व्यायाम सुरू करण्याऐवजी हळूहळू सुरुवात करावी.
गुडघ्यांना आधार देणारे स्नायू मजबूत करा
गुडघ्यांचे आरोग्य चांगले ठेवण्यासाठी केवळ सांध्यांकडे लक्ष देणे पुरेसे नाही. मांडी आणि पायांचे स्नायू मजबूत असणेही आवश्यक आहे. क्वाड्रिसेप्स आणि हॅमस्ट्रिंग्ससारख्या स्नायूंना बळकटी देणारे योग्य व्यायाम केल्याने गुडघ्यांना आधार मिळण्यास मदत होऊ शकते. मात्र, आधीपासून गुडघेदुखीचा त्रास असल्यास व्यायाम सुरू करण्यापूर्वी तज्ज्ञांचा सल्ला घेणे योग्य ठरेल.
वाढलेले वजन नियंत्रणात आणा
शरीराचे वजन वाढल्यास दैनंदिन हालचाली करताना गुडघ्यांवर अधिक ताण पडू शकतो. त्यामुळे गुडघ्यांचे आरोग्य टिकवण्यासाठी वजन नियंत्रणात ठेवणे महत्त्वाचे आहे. यासाठी संतुलित आहार, नियमित शारीरिक हालचाल आणि सातत्यपूर्ण जीवनशैलीचा अवलंब करणे गरजेचे आहे. झटपट वजन कमी करण्याच्या उपायांपेक्षा दीर्घकाळ टिकणाऱ्या सवयींवर भर द्यावा.
व्यायामाची सुरुवात हळूहळू करा
दीर्घकाळ व्यायाम केला नसेल तर अचानक हेवी वर्कआउट सुरू करणे टाळावे. शरीराला नवीन व्यायामाची सवय होण्यासाठी वेळ लागतो. त्यामुळे सुरुवातीला हलक्या हालचाली किंवा सोपा व्यायाम करून त्यानंतर हळूहळू तीव्रता वाढवणे योग्य ठरू शकते. शरीरावर क्षमतेपेक्षा जास्त ताण दिल्यास दुखापतीचा धोका वाढू शकतो.
पायांसाठी योग्य फूटवेअर निवडा
आपण दररोज वापरत असलेले शूज किंवा चप्पल यांचाही गुडघ्यांच्या आरोग्याशी संबंध असू शकतो. पायाला योग्य आधार देणारे, आरामदायक आणि व्यवस्थित फिट होणारे फूटवेअर निवडणे महत्त्वाचे आहे. खूप झिजलेली पादत्राणे वापरणे टाळावे. तसेच उंच टाचांचे फुटवेअर नियमित वापरण्याऐवजी आरामदायक पर्याय निवडणे योग्य ठरू शकते.
