कुणी पलंगावर झोपलं, कुणी चिकन खाल्लं, तर कुणी भला मोठा मासा घेतला; पंतप्रधानांच्या निवासात आंदोलक घुसल्यावर काय घडलं?

बांग्लादेश सध्या दहशतीचं वातावरण आहे. शेख हसिना यांनी पंतप्रधानपदाचा राजीनामा देत देश सोडला. त्या सध्या भारतात आल्या आहेत. असं असतानाच बांग्लादेशमधील परिस्थिती मात्र हाताबाहेर चालली आहे. बांग्लादेशमधील पंतप्रधानांच्या निवासात आंदोलक घुसले. या आंदोलकांनी पंतप्रधान निवासातील जेवणावर ताव मारला. याचे फोटो सध्या समोर आले आहेत. यात कुणी पंतप्रधान निवासातील पलंगावर झोपल्याचं दिसत आहे. तर कुणी चिकन खातंय. तर तर कुणी भला मोठा मासा घेतल्याचं दिसलं. ‘कुणाचं काय तर कुणाचं काय…’ हीच म्हण बांग्लादेशमधील दृश्य पाहिल्यानंतर मनात येते.

आंदोलक पंतप्रधान निवासस्थानात घुसले

शेख हसिना यांनी ढाका शहर सोडल्याची बातमी पसरताच आंदोलकांनी पंतप्रधान निवासस्थानाकडे धाव घेतली. दुपारी तीन वाजता ‘गानोभाबोन’ या पंतप्रधानांच्या निवासस्थानी आंदोलक घुसले. घरात जाताच आंदोलकांनी जल्लोष केला. हे आंदोलक पंतप्रधानांच्या निवासस्थानी पोहोचण्याआधीच हसिना आणि त्यांची बहीण तिथून भारताकडे येण्यासाठी निघाल्या होत्या.

तो आला अन् मासा घेऊन गेला…!

जे दिसेल ते आपलं मानत बांग्लादेशमधील लोकांनी पंतप्रधान निवासस्थानातील जेवण ताव मारला… तर कुणी इथल्या किमती वस्तू घेऊन फरार झालं. तर काहींनी या अलिशान वास्तूचा पुरेपुर आनंद घेतला. कुणी सोफ्यावर आरामात बसलं. तर कुणी बेडवर झोपून आराम केला. इतकंच नव्हे तर एकजण तर भलामोठा मासा घेऊन जाताना दिसला. तर कुणी बदक घेतलं. या घटनेचे फोटो आणि व्हीडिओ व्हायरल होत आहेत.

पंतप्रधान निवासातील साहित्य घेऊन फरार

आंदोलक पंतप्रधानांच्या निवासस्थानी जाताच त्यांनी धुडगूस घातला. त्याचा व्हीडिओ आणि फोटो व्हायरल झाले आहेत. हजारो लोक पंतप्रधानांच्या निवासस्थानात घुसले. तिथं पोलीस कर्मचारी किंवा सुरक्षारक्षकही दिसत नव्हते. या लोकांनी काही काळ या वास्तूत आनंद लुटला. इतकंच नव्हे तर तिथला सोफा, खुर्च्यादेखील लोक उचलून घेऊन जात होते. तर कुणी टीव्ही घेऊन फरार झालं. शेख हसिना यांनी देश सोडताच बांग्लादेशमध्ये हाहा: कार माजला आहे.