अफगाणिस्तान पुन्हा हादरले! काबुलमध्ये बॉम्बस्फोट; 15 ठार
पुन्हा एकदा अफगानिस्तान शक्तीशाली बॉम्बस्फोटाने हादरले आहे. अफगानिस्तानची राजधानी असलेल्या काबुलमध्ये बॉम्बस्फोट करण्यात आला आहे. या स्फोटात 15 नागरिकांचा मृत्यू झाला आहे.
काबुल – पुन्हा एकदा अफगाणिस्तान शक्तीशाली बॉम्बस्फोटाने हादरले आहे.अफगाणिस्तानची राजधानी असलेल्या काबुलमध्ये बॉम्बस्फोट करण्यात आला आहे. या स्फोटात 15 नागरिकांचा मृत्यू झाला असून, शहरातील सरदार मोहम्मद दाऊद खान (Sardar Mohammad Daud Khan Hospital) रुग्णालयासमोर हा आत्मघाती हल्ला झाला. या हल्ल्यानंतर परिसरात गोळीबार झाल्याची माहिती प्रत्यक्षदर्शीकडून देण्यात आली आहे. मात्र हा हल्ला का करण्यात आला? हल्ल्याचा सूत्रधार कोण याबाबत अद्याप कोणतीही माहिती मिळू शकलेली नाही.
अफगाणिस्तानमध्ये झालेल्या या हल्ल्याप्रकरणी अद्याप तालिबानच्या वतीने कोणतीही प्रतिक्रिया देण्यात आलेले नाही, ऑगस्टमध्ये तालीबानने देशाचा कब्जा मिळवला होता. तेव्हापासून काबूलमध्ये हल्ल्यांना सुरुवात झाली असून, या सर्व हल्ल्यांमागे ‘इस्लामिक स्टेट’चा हात असल्याचे बोलले जात आहे. इस्लामिक स्टेटवर लवकरच नियंत्रण मिळू असे वारंवार तालीबानकडून सांगण्यात येत आहे. मात्र प्रत्यक्षात अफगाणिस्तानच्या उत्तर भागामध्ये संघटनेचे वर्चस्व वाढत असल्याचे दिसून येत आहे. इस्लामिक स्टेटला आळा घालण्याचे मोठे आव्हान आता तालीबानसमोर असणार आहे.
ऑगस्टमध्येही झाला होता स्फोट
यापूर्वी देखील ऑगस्ट महिन्यात काबुलच्या विमानतळावर मोठा हल्ला करण्यात आला होता. 26 ऑगस्टला झालेल्या या हल्ल्यामध्ये तब्बल 100 जणांना आपला जीव गमावावा लागला. तर 150 पेक्षा अधिक जण जखमी झाले होते. तालीबानने अफगाणिस्तानचा ताबा मिळवल्यानंतर अनेक जण देश सोडून स्थलांतरणाच्या तयारीत असताना हा बॉम्बस्फोट करण्यात आला होता. त्यानंतर सातत्याने अफगाणिस्तानमध्ये बॉम्बस्फोट सुरूच आहेत. दरम्यान 26 ऑगस्टला झालेल्या या हल्ल्यामागे देखील इस्लामिक स्टेटचाच हात असल्याचे मानण्यात येत आहे. या हल्ल्याची माहिती अधिच मिळाली होती. माहिती मिळाल्यानंतर अनेक देशांनी आपल्या नागरिकांना विमानतळापासून दूर राहाण्याचे आवाहन देखील केले होते. गुप्तचर संस्थांना बॉम्बस्फोट होणार असल्याची माहिती मिळाल्यानंतर देखील हा हल्ला थांबवण्यात अपयश आहे. या बॉम्बस्फोटानंतर तालीबानला मदत करण्याचे आश्वासन अमेरीकेकडून देण्यात आले होते. मात्र अमेरिकेची मदत घेण्यास तालीबानने नकार दिला.
संबंधित बातम्या
