डोनाल्ड ट्रम्प यांची सर्वात मोठी घोषणा, युद्धाबाबत संपूर्ण जगाला दिली ती खुशखबर; अखेर…

Israel Lebanon Ceasefire : अमेरिका-इस्त्रायल आणि इराण यांच्यातील युद्ध अजूनही पूर्णपणे थांबलेले नाही. इस्लामाबदमधील पहिल्या बैठकीत चर्चा निष्फळ ठरल्यानंतर अमेरिकेने होर्मुझच्या सामुद्रधुनीत नाकेबंदीला सुरुवात केली होती. याला उत्तर म्हणून इराणने होर्मुझची सामुद्रधुनीच बंद केली. या दोन्ही देशांत सध्या तणावाची स्थिती आहे. त्यामुळेच इराणचे युद्ध आणखी भडकण्याची शक्यता व्यक्त केली जात आहे. असे असतानाच आता संपूर्ण जगाला दिलासा देणारी एक माहिती समोर येत आहे. अमेरिकेचे राष्ट्राध्यक्ष डोनाल्ड ट्रम्प यांनीच याबाबत घोषणा केली आहे.

ट्रम्प यांनी नेमकी काय घोषणा केली?

डोनाल्ड ट्रम्प यांच्या घोषणेनुसार लेबनॉन आणि इस्रायल यांच्यात सहमतीने युद्धविरामाची मुदत वाढवण्यात आली आहे. आता पुढचे तीन आठवडे हा युद्धविराम कायम असेल. त्यामुळे या काळात इस्रायल लेबनॉनवर हल्ले करणार नाही. या युद्धविरामाबबत चर्चा करण्यासाठी अमेरिकेतील व्हाईट हाऊसमध्ये एक महत्त्वाची बैठक बोलवण्यात आली होती. या बैठकीला इस्रायलचे राजदूत येचिएल लायटर आणि लेबॉननचे राजदूत नदा मोवावाद हे उपस्थित होते. या बैठकीनंतर ट्रम्प यांनी लेबनॉन आणि इस्रायल यांच्यात तीन आठवड्यांसाठी युद्धविराम झाल्याची घोषणा केली.

याआधी 10 एप्रिल 2026 रोजी दोन्ही देशांत 10 दिवसांसाठी युद्धविरामावर सहमती झाली होती. ही मुदत येत्या 27 एप्रिल रोजी संपणार होती. त्याआधीच अमेरिकेचे उपराष्ट्राध्यक्ष जे डी व्हान्स, अमेरिकेचे परराष्ट्रमंत्री मार्क रुबियो आणि इस्त्रायल, लेबनॉन या दोन्ही देशांचे राजदूत यांच्यात ही बैठक झाली आणि युद्धविराम आणखी तीन आठवड्यासाठी वाढवण्यात आल्याची घोषणा करण्यात आली.

दरम्यान, दोन्ही देशांत एकमेकांवर हल्ला न करण्यावर एकमत झालेले असले तरीही प्रत्यक्षात मात्र हल्ले सुरूच आहेत. युद्धविराम असूनही दक्षिण लेबनॉनमध्ये हल्ले केले जात आहेत. लेबनॉनच्या आरोग्यमंत्र्यांनी दिलेल्या माहितीनुसार इस्रायलच्या हल्ल्यांत दक्षिण लेबनॉनमध्ये नुकतेच 3 जणांचा मृत्यू झाला असून दोघे जखमी झाले आहेत. मृतांमध्ये पत्रकार अमल खलील यांचाही समावेश आहे.