कोणी देश मदतीला येईना… डोनाल्ड ट्रम्प पडले एकटे, थेट चीनसह नाटोलाच…

इराणसोबतच्या युद्धात डोनाल्ड ट्रम्प यांना एका मागून एक मोठे झटके बसताना दिसत आहेत. आजच्या घडीला कोणताही देश अमेरिकेच्या बाजूने उभा दिसत नाही. अमेरिकेने मदत मागूनही अनेक देशांनी थेट हातावर तुरी देत अमेरिकेच्या मदतीला उत्तर दिले नाही. कोणत्याही देशाकडून सकारात्मक प्रतिसाद मिळत नसल्याने डोनाल्ड ट्रम्प यांचा थयथयाट बघायला मिळत आहे. होर्मुज खाडी जी इराणकडून बंद करण्यात आली ती सुरक्षित करण्याचे मोठे आव्हान आजच्या घडीला अमेरिकेपुढे मोठ्या डोंगराइतके आहे. मदत मागूनही एकही देश पुढे येत नसल्याने डोनाल्ड ट्रम्प यांनी आता थेट खूप वाईट भविष्याला समोरे जाण्याचा मोठा इशारा दिला. डोनाल्ड ट्रम्प यांनी म्हटले की, जर कोणताही प्रतिसाद किंवा जर नकारात्मक प्रतिसाद मिळाला तर भविष्य नाटोसाठी खूप जास्त वाईट असेल. डोनाल्ड ट्रम्प यांना वाटले होते की, होर्मुज खाडीत इतर देश लगेचच आपले सैन्य पाठवतील. मात्र, एकही देश डोनाल्ड ट्रम्प यांच्या मदतीकरिता पुढे येत नसल्याने त्यांच्याकडून थेट मोठी धमकीच देण्यात आली.

अमेरिकेने युक्रेनला रशियाच्याविरोधात पाठिंबा दिला होता आणि नाटोची बारी असल्याचे त्यांनी म्हटले. डोनाल्ड ट्रम्प यांनी पुढे बोलताना म्हटले की, मला वाटते की, चीनने मदत करायला हवी. कारण त्यांचे 90 टक्के तेल याच सामुद्रधुनीतून येते, त्यामुळे त्यांनी मदतीला पुढे यायला हवे. या मार्गाचा प्रामुख्याने फायदा घेणाऱ्या देशांनी काहीही चुकीचे होणार नाही, हे बघितले पाहिजे.

पुढे बोलताना डोनाल्ड ट्रम्प यांनी म्हटले की, जर चीनने याकरिता आम्हाला मदत केली नाही तर चीनचे अध्यक्ष शी जिनपिंग यांच्यासोबत असलेली नियोजित शिखर परिषद आम्ही पुढे ढकलू. एकप्रकारे आता अमेरिकेकडून चीनवर दबाव टाकण्याचे काम सुरू आहे. अगोदरच चीन या युद्धात इराणच्या बाजूने आहे. इराणकडून तसा खुलासाही करण्यात आला. मात्र, होर्मुज खाडीत अमेरिकेला चीनला उतरवायचे आहे.

होर्मुज मार्गाने चीनमध्ये कच्चे तेल दाखल होते. मात्र, जर चीन येथे अमेरिकेच्या बाजूने होर्मुज खाडीत उतरला तर समीकरण वेगळे होईल. फक्त चीनच नाही तर ज्या ज्या देशांकडून डोनाल्ड ट्रम्प यांनी मदत मागितली, ज्यापैकी एकही देश चीनच्या मदतीला यायला तयार नाही. त्यामध्येच आता नाटो देशांनाही थेट डोनाल्ड ट्रम्प यांनी धमकी दिली.