हायवेवर थरार, थेट फुटबॉल टीमवर हल्ला! भीतीमुळे एक संघ स्पर्धेत उतरलाच नाही, अध्यक्षाने आधीच दिला होता इशारा…
फुटबॉलच्या सामन्यासाठी बसमधून निघालेल्या संघासोबत भयंकर किस्सा घडला आहे. यावेळी बसमध्ये तब्बल 20 खेळाडू होते. त्यांच्यासोबत इतरही प्रवासी होते. त्यांनाही यावेळी मारहाण करण्यात आली.
फुटबॉलची टीम एका मोठ्या स्पर्धेसाठी जायला निघते. त्यानंतर टीम ज्या बसमध्ये असतेस त्या बसला महामार्गावर अडवले जाते आणि जे अडवतात ते सशस्त्र बंदुकधारी सराईत गुंड असतात. ही घटना अंगावर काटा आणणारी आहे ना. हा प्रसंग कोणत्याही सिनेमातील नसून खरीखुरी घटना आहे. ही घटना पाकिस्तानमध्ये घडली आहे. कराचीच्या एका फुटबॉल टीमबाबब ही घटना घडली असून या घटनेची सोशल मीडियावर प्रचंड चर्चा होते आहे. यावेळी सर्व खेळाडूंना धमकावण्यात आलं त्यांना जीवे मारण्याच्या धमक्या देण्यात आल्या. त्यांच्याकडील रोख पैसे, मोबाईल आणि इतर मौल्यवान वस्तू हिसकावून घेण्यात आल्या. एवढच नाही तर बसमध्ये जे इतर प्रवासी प्रवास करत होते. त्यांनाही या गुंडांनी सोडलं नाही. त्यांनाही जोरदार मारहाण करण्यात आली. त्यामुळे काही काळ त्याठिकाणी तणावाचं वातावरण तयार झालं होतं. याबद्दलच वृत्त पीटीआयने दिलं आहे.
नेमकी काय घडलं?
कराचीचा संघ केट्टासाठी निघाला होता. यावेळी मस्तंग आणि सारियाब दरम्यानच्या बलुचिस्तान हायवेवर तोंडासा मास्क लावलेल्या आणि सशस्त्र असलेल्या गुंडाची टोळी बसच्या समोर आली. या टोळीने बसला घेराव घातला. या बसमध्ये तब्बल 20 फुटबॉलपटू होते. हा सर्व कराचीचा संघ मुख्यमंत्री गोल्ड कप स्पर्धेमध्ये सहभागी होणार होता पण त्यापूर्वीच त्यांच्यावर हा हल्ला करण्यात आला. त्याच्याकडील सर्व मौल्यवान वस्तू जप्त करण्यात आल्या. याबद्दलची माहिती संघाच्या व्यवस्थापकांनीही दिली आहे. त्यांनी घडलेल्या घटनेची हकिकत सांगताना आमच्यावर हल्ला झाल्याचे मान्य केलं आहे. या घटनेची माहिती क्रीडा मंत्र्यांनाही पोहचवली असल्याचे त्यांनी कळविले आहे.
दरम्यान, सिंध फुटबॉल असोशिएशनचे अध्यक्ष यांचं वक्तव्य ऐकून तर सर्वजण आश्चर्य व्यक्त करत आहेत. त्यांनी सांगितलं की, सुरक्षेच्या प्रश्नामुळे आम्ही आवाहन केलं होतं की कोणीही बस किंवा ट्रेनने प्रवास करु नये, असं सांगितलं होतं. याच कारणाने आम्ही आमचा संघ या स्पर्धेमध्ये खेळायला पाठवला नाही. त्याचेच परिणाम आता कराचीच्या संघाला भोगावे लागत आहेत, असं ते म्हणाले आहेत. त्यामुळे पाकिस्तानमध्ये सुरक्षेचा प्रश्न किती गंभीर आहे, हेच या घटनेतून समोर आले आहे.
