Petrol Price: गरिबांसाठी पेट्रोल 100 रुपयांनी स्वस्त, सर्वसामान्यांना मोठा दिलासा, पण शहबाज सरकार लाभार्थ्यांना कसं ओळखणार?
Petrol Diesel Cheaper in Pakistan: पाकिस्तान सरकारने सर्वसामान्यांसह गरिबांना मोठा दिलासा देण्याचा निर्णय घेतला आहे. पेट्रोल या वर्गासाठी 100 रुपयांनी स्वस्त होणार आहे. पण शहबाज सरकार या लाभार्थ्यांना ओळखणार कसं?
पाकिस्तानमध्ये पेट्रोलच्या किंमती 370 रुपये प्रति लिटरवर पोहचल्या आहेत. पंतप्रधान शहबाज शरीफ यांनी सर्वसामान्य नागरिकांसह गरिबांना दिलासा देण्याचा निर्णय घेतला आहे. प्राईम मिनिस्टर फ्यूएल रिलीफ स्कीम जाहीर केली आहे. त्यातंर्गत पेट्रोलपंपावर सामान्यांना थेट 100 रुपये प्रति लिटरची सवलत देण्यात येणार आहे. गरजवंतांनाच या योजनाचा लाभ देण्यात येणार आहे. सरकारी कर्मचारी, व्यापारी आणि मोठ्या व्यावसायिकांना या योजनेचा लाभ मिळणार नाही. इस्लामाबादमध्ये केंद्रीय मंत्री अता तरार, शाजा फातिमा आणि अली परवेज मलिक यांनी या निर्णयाची माहिती दिली. विशेष म्हणजे या योजनेसाठी सरकारी कार्यालयाचे उंबरठे झिजवण्याची गरज नाही. घरबसल्या नागरिक त्यांच्या मोबाईलमध्ये सरकारी सेवा प्लॅटफॉर्मवर नोंदणी करून सवलतीत पेट्रोल मिळवू शकतील.
कसा होईल फायदा?
बाईक आणि रिक्षा चालक: दुचाकी आणि तीनचाकी रिक्षा चालकांना दरमहा जास्तीत जास्त 20 लिटर पेट्रोलवर 100 रुपये प्रति लिटरची सवलत मिळेल. एका टोकनवर 5 लिटर पेट्रोल मिळेल, त्यावर थेट 500 रुपयांची बचत होईल.
800cc पर्यंतच्या कार चालकांना दिलासा: 800 सीसी इंजिन क्षमता असणाऱ्या कार चालकांनाही या योजनेचा लाभ मिळेल. त्यांना प्रत्येक महिन्यात 30 लिटरपर्यंत पेट्रोलवर 100 रुपये प्रति लिटरची सवलत देण्यात येणार आहे. कारसाठी एका टोकनवर 10 लिटर पेट्रोल मिळेल. त्यावर एक हजार रुपयांची बचत होईल.
अशी होणार नोंदणी
पाकिस्तानमधील आयटी आणि दूरसंचार राज्य मंत्री शाजा फातिमा यांनी त्यासाठी सरकारच्या ॲपवर मोबाईलमधून नोंदणी करावी लागेल असे स्पष्ट केले. नागरिक घरबसल्या या ॲपवर नोंदणी करून स्वस्त पेट्रोल मिळवू शकतील. या योजनेसाठी मोबाईल एसएमएसद्वारे सुद्धा नोंदणी करता येणार आहे. ज्या व्यक्तीच्या नावे सिम कार्ड आहे. त्याची पडताळणी होील. त्यानंतर वाहन क्रमांका आधारे पडताळणी होईल.
डिजिटल पेट्रोल टोकन
नोंदणी प्रक्रिया पूर्ण झाल्यावर डिजिटल पेट्रोल टोकन प्राप्त करण्यासाठी नागरिकांना 9771 वर “TOK” असे लिहून एसएमएस पाठवावा लागेल. निश्चित केलेल्या पेट्रोल पंपावर हे टोकन दाखवल्यावर पंपावरील कर्मचारी टोकनचा पडताळा करण्यात येईल. त्यानंतर नागरिकांना स्वस्तात पेट्रोल देण्यात येईल. फोन कॉल, एसएमएस वा व्हॉट्सॲपवर टोकन नंबर सरकार मागणार नाही असे शाजा फातिमा यांनी स्पष्ट करत ऑनलाईन फसवणुकीपासून सावध राहण्याचे आवाहन त्यांनी केले.
