दुबईला जाणाऱ्या फ्लाईटमध्ये केवळ ती एकटीच, महिलेने सांगितले प्रवासाचे खरे कारण, सर्वच हैराण – Video
इराण युद्धानंतर वातावरणात तणाव असताना एका महिलेने दुबईची फ्लाईट पकडली. मात्र, संपूर्ण विमानात ती एकटीच होती. तिने तिच्या प्रवासाचे कारण आणि आलेला अनुभव सोशल मीडियावर शेअर केला आहे.
इराण युद्धामुळे अत्यंत सुरक्षित अशा दुबईतून लवकरात लवकर बाहेर पडण्यासाठी लोक धडपडत असताना या काळात एका महिलेने दुबईला जाण्यासाठी विमानाचे तिकीट बुक केले खरे, परंतू जेव्हा ती प्रत्यक्षात विमानात बसली तेव्हा संपूर्ण विमानात ती एकटीच प्रवासी होती. हा विचित्र अनुभव या महिलेने सोशल मीडियावर शेअर केला आहे. युद्धाच्या काळात या महिलेचे धाडस पाहून नेटकरी हैराण झाले आहे.
दुबईला जाणाऱ्या फ्लाईटमध्ये एकटीच
या महिला प्रवाशाचे नाव Marina Gilla आहे. ती लातव्हिया (Latvia) येथील रहिवासी असून पेशाने एक इंग्रजी शिक्षिका आहे. मारिना हीने सांगितले की Riga ते दुबई अशा फ्लाईटमध्ये प्रवास करत होती. परंतू त्या दिवशी विमानात तिच्याशिवाय अन्य कोणीच नव्हते.
मारिना हीने तिच्या सोशल मीडिया अकाऊंटवर व्हिडीओ शेअर करत सांगितले की ८ मार्च २०२६ रोजी जेव्हा तिने दुबईसाठी उड्डाण घेतले तेव्हा विमानात ती एकटीच प्रवासी होती. तिने लिहीलंय की हा अनुभव खूपच अजब होता. कारण सर्वसाधारणपणे एखाद्या कमर्शियल फ्लाईटमध्ये प्रवासी नाहीत असे कधी घडत नाही.
दुबईला का जात होती ?
मारिना हीने लिहिलंय की त्यांना दुबईत एका चांगल्या नोकरीचा प्रस्ताव मिळाला होता. त्यामुळे तिने या युद्धजन्य स्थितीत दुबईला जाण्याचा निर्णय घेतला. मारिना यांनी म्हटलंय की त्यांना आशा होती की फ्लाईट रद्द होणार नाही आणि ती सुरक्षितपणे संयुक्त अरब अमिरातला पोहचेल.
फ्लाईटमध्ये मिळाला खास अनुभव
मारिना हीने सांगितले की या विमानात चार फ्लाईट अटेंडेंट हजर होते. मात्र, अन्य कोणताही प्रवासी नव्हता. त्यामुळे क्रु मेंबर वेगवेगळ्या आसनांवर बसून आराम करत होते आणि जेवण करत होते. मारिना हीने लिहीलंय पायलट स्वत: त्यांच्याशी बोलायला आले आणि त्यांनी विमानाला उशीर होत असल्याबद्दल माफीही मागितली.
येथे पाहा व्हिडीओ –
View this post on Instagram
मारिना यांनी म्हटलंय की फ्लाईट थोडी लेट होती. परंतू प्रवास एकदम आरामदायक झाला. त्यांना क्रुने खूप खायला देखील दिले. मारिना एकदम सुखरुपपणे दुबईत उतरल्या.आता त्या नव्या नोकरीच्या ठिकाणी रुजू होण्याची तयारी करत आहेत.
इराणवर अमेरिका-इस्राईल यांनी २८ फेब्रुवारी रोजी हल्ला केला आहे. त्यामुळे आखाती देशातील अनेक विमानतळ इराणच्या ड्रोन हल्ल्याने बंद आहेत. तेथे अडकलेले प्रवासी मिळेल त्या विमानाने बाहेर पडण्याचा प्रयत्न करत आहेत.
