जपानमध्ये हाहाकार! भूकंपानंतर त्सुनामीचा कहर, किनार्‍यावर उंचच उंच लाटा… समुद्रात जहाजे कोलमडली

जपानमध्ये आज भूकंपाचे धक्के जाणवले आहेत. रिक्टर स्केलवर याची तीव्रता 7.4 इतकी नोंदवली गेली. या भूकंपाचे केंद्र सानरिकु किनाऱ्यापासून सुमारे 100 किलोमीटर अंतरावर समुद्रात होते. तसेच भूकंपाची खोली 10 किलोमीटर असल्याची माहिती समोर आली आहे. भूकंपाच्या या धक्क्यानंतर जपानमध्ये त्सुनामीचा हाय अलर्ट जाहीर करण्यात आला आहे. तसेच जपानच्या हवामान विभागाने दिलेल्या माहितीनुसार, काही भागांमध्ये सुनामीच्या लाटा निर्माण झाल्या आहेत. मियाको बंदरात सुमारे 80 सेंटीमीटर उंचीची सुनामीची लाट नोंदवली गेली आहे, होक्काइडो आणि इवाते या भागातील किनाऱ्यावरील लाटांची उंची वाढण्याची भीती हवामान विभागाने व्यक्त केली आहे, त्यामुळे सरकारची चिंता वाढली आहे.

हाय अलर्ट जारी

जपानच्या सरकारी वाहिनी एनएचकेने दिलेल्या माहितीनुसार, हवामान तज्ज्ञांनी जपानच्या मुख्य बेटाच्या उत्तरेकडील भागातील आओमोरी प्रांताच्या किनाऱ्यापासून सुमारे 50 किमी अंतरावर सुनामीची नोंद केली आहे. यामुळेच देशातील किनाऱ्यांना हाय अलर्ट देण्यात आला आहे. सुनामीच्या इशाऱ्यानंतर समुद्राचा एक व्हिडिओ व्हायरल झाला आहे, ज्यामध्ये जहाजे किनाऱ्याकडे धावताना दिसत आहेत.

जपानमध्ये आज झालेल्या भूकंपानंतर अणुऊर्जा प्रकल्पांची सुरक्षा वाढवण्यात आली आहे. स्थानिक शास्त्रज्ञ ओनागावा अणुऊर्जा केंद्राची तपासणी करत आहेत, या ठिकाणी कोणतीही असामान्य स्थिती आहे का हे तपासले जात आहे. अशातच जपानच्या पंतप्रधान सना ताकाएची यांनी नागरिकांना सुरक्षित ठिकाणी राहण्याचे आवाहन केले आहे. तसेच या संकटकाळात शांतता आणि संयम ठेवावा अशी विनंतीही केली आहे.

जपानमध्ये जास्त भूकंप का होतात?

जपानमध्ये यावर्षी 3 असे भूकंप झाले आहेत, ज्यांची तीव्रता 6 रिश्टर स्केलपेक्षा जास्त होती. 2025 मध्ये जपानमध्ये 1500 पेक्षा अधिक भूकंपाचे धक्के नोंदवले गेले होते. त्यामुळे तुमच्याही मनात असा प्रश्न उपस्थित झाला असेल की, जपानमध्ये इतके भूकंप का होतात? याचे उत्तर म्हणजे, प्रत्यक्षात जपान चार मोठ्या टेक्टॉनिक प्लेट्सवर वसलेला देश आहे आणि तो प्रशांत महासागरातील रिंग ऑफ फायर या भागाचा एक हिस्सा आहे. या भागात पृथ्वीखालील प्लेट्स सतत एकमेकांवर आदळत असतात, त्यामुळे या देशात मोठ्या प्रमाणात भूकंप होत असतात.