युक्रेनचा रशियावर सर्वात मोठा हल्ला! बघता बघता 822 ड्रोन…अचानक नेमकं काय घडलं?

युक्रेनने रशियावर आतापर्यंतचा सर्वात मोठा प्राणघातक हवाई हल्ला केला आहे. रविवारी रात्री केलेल्या या हल्ल्याने रशियाचे मोठे नुकसान झाले आहे. युक्रेनने ड्रोनद्वारे रशियाची राजधानी मॉस्कोपासून रोस्तोवपर्यंत प्रचंड विध्वंस घडवला आहे. रशियाने आपण युक्रेनचे ८२२ ड्रोन पाडल्याचा दावा केला आहे. या भीषण हल्ल्यात रशियाचे किमान सहा जण ठार झाले आहेत.

मॉस्को आणि रोस्तोवमध्ये प्रचंड विध्वंस

युक्रेनचे अंदाजे ६०० ड्रोन थेट राजधानी मॉस्कोच्या दिशेने येत होते. यापैकी एक तृतीयांश ड्रोन मॉस्को शहराच्या परिसरातच हवेतच नष्ट करण्यात आल्याचे मॉस्कोचे महापौर सर्गेई सोब्यानिन यांनी म्हटले आहे. एक ड्रोन थेट एका निवासी इमारतीला धडकल्याने यात ८३ वर्षांच्या वृद्ध इसमाचा मृ्त्यू झाला असल्याचे मॉस्को प्रदेशाचे गव्हर्नर आंद्रेई वोरोब्योव यांनी सांगितले. या हल्ल्याने पोडॉल्स्क शहरातील ‘वाइल्डबेरीज’ या ई-कॉमर्स कंपनीच्या मोठ्या गोदामांना भीषण आग लागली आणि आकाशात काळ्या धुराचे लोट पसरल्याचे दूरपर्यंत दिसत होते.

दुसरीकडे, रशियाचा रोस्तोव्ह हा प्रदेशही हादरला. युक्रेनने 150 हून अधिक ड्रोनच्या मदतीने रोस्तोवच्या तीन शहरांवर हल्ला केला. येथे झालेल्या हल्ल्यात पाच जणांचा मृत्यू झाला. अनेक निवासी घरे, रेल्वे स्टेशन आणि आजूबाजूचे जंगलांना या ड्रोन हल्ल्याने आग लागल्याचे गव्हर्नर युरी स्ल्युसर यांनी सांगितले.

रशियाने युक्रेनवर हल्ला केला का?

रशियानेही क्षेपणास्त्रे आणि ड्रोनने हल्ला केला आहे. रशियन क्षेपणास्त्र क्रिवी रिह शहरावर आदळल्याने दोन जण ठार तर १४ जण जखमी झाल्याचे युक्रेनचे अध्यक्ष वोलोडिमिर झेलेन्स्की यांनी सांगितले. सुमी शहरात एका व्यक्तीला आपला जीव गमवावा लागला आहे. युक्रेनची राजधानी कीवमध्ये अनेक ठिकाणी आग लागली असून त्यात सहा जण दगावले आहेत. रशिया जाणीवपूर्वक बॅलेस्टिक क्षेपणास्त्रांच्या मदतीने युक्रेनच्या नागरी भागांना लक्ष्य करीत असल्याचा आरोप झेलेन्स्की यांनी केला आहे.