‘सुवर्णनगरी’ जळगावचे प्रसिद्ध सराफ रतनलाल बाफना कालवश

रतनलाल बाफना यांनी 1988 मध्ये सराफ बाजारातच 'नयनतारा' हे भव्य शोरुम सुरु केले होते.

Anish Bendre | Updated on: Nov 16, 2020 | 5:52 PM

जळगाव : ‘सुवर्णनगरी’ जळगावमधील प्रसिद्ध सराफ व्यावसायिक रतनलाल चुनीलाल बाफना (Ratanlal Chunilal Bafna) यांचे वृद्धापकाळाने निधन झाले. पाडवा-भाऊबीजेच्या दिवशी (सोमवार 16 नोव्हेंबर) दुपारी तीन वाजण्याच्या सुमारास जळगावातील राहत्या घरीच त्यांनी अखेरचा श्वास घेतला. मृत्यूसमयी ते 87 वर्षांचे होते. (Jalgaon Famous Jeweler Ratanlal Chunilal Bafna passed away)

रतनलाल चुनीलाल बाफना यांच्या पार्थिवावर जळगाव शहराजवळ असलेल्या कुसुंबा येथील त्यांच्या गोशाळेच्या आवारात अंत्यसंस्कार करण्यात येतील, अशी माहिती बाफना कुटुंबीयांच्या वतीने देण्यात आली आहे.

मूळचे राजस्थानातील भोपालगढ येथील बाफना घराणे व्यवसाय निमित्ताने जळगावात स्थायिक झाले होते. सराफ व्यवसायात रतनलाल बाफना यांनी विशेष नावलौकिक मिळवला.

वयाच्या 19 व्या वर्षी दहावीचे शिक्षण आणि धडाडी वृत्तीसह ते घराबाहेर पडले. आपले नशिब आजमावण्यासाठी 1954 मध्ये ते जळगावात आले. सुरुवातीला लहानमोठ्या नोकऱ्या करत त्यांनी व्यवसायात उडी घेतली.

रतनलाल बाफना यांनी 1988 मध्ये सराफ बाजारातच ‘नयनतारा’ हे भव्य शोरुम सुरु केले होते. त्यानंतर चांदीच्या दागिन्यांसाठी स्वतंत्र असे ‘पारसमहल’ शोरुम सुरु केले. बाफना यांचा व्यवसाय त्यानंतर विस्तारत गेला. जळगावसह मुंबई, पुणे, औरंगाबाद अशा महानगरांमध्ये त्यांनी ‘आर. सी. ज्वेलर्स’ नावाने सुवर्णपेढ्या सुरु केल्या होत्या.

रतनलाल बाफना हे शाकाहार प्रणेते म्हणून परिचित होते. सामाजिक कार्यात त्यांचा नेहमी सक्रिय सहभाग असे. सामाजिक कार्यासोबत त्यांना गोसेवेची विशेष आवड होती. वैद्यकीय, शिक्षण क्षेत्रात ते नेहमी मदतीचा हात द्यायचे. तळागाळातील लोकांना मदत करण्यासाठी ते अनेक उपक्रम राबवत असत. वाजवी दरात गरजूंना अन्न मिळावे यासाठी ‘क्षुधाशांती’ केंद्रात योगदान दिले. तर तहान भागवण्यासाठी जलमंदिर उभारले. (Jalgaon Famous Jeweler Ratanlal Chunilal Bafna passed away)