‘स्वदेस’फेम ‘कावेरी अम्मा’चं निधन

मुंबई : अभिनेता शाहरुख खानची मुख्य भूमिका असलेल्या ‘स्वदेस’ चित्रपटात ‘कावेरी अम्मा’ची भूमिका साकारणाऱ्या अभिनेत्री किशोरी बल्लाळ यांचं निधन (Swades Actress Kishori Ballal Dies) झालं. गेल्या साठ वर्षांपासून किशोरी बल्लाळ यांनी दाक्षिणात्य चित्रपटसृष्टी गाजवली आहे.

गेल्या काही दिवसांपासून किशोरी बल्लाळ आजारी होत्या. त्यांच्यावर बंगळुरुतील रुग्णालयात उपचार सुरु होते. मात्र मंगळवारी त्यांची प्राणज्योत मालवली. त्या 82 वर्षांच्या होत्या. भरतनाट्यम नर्तक एन श्रीपती बल्लाळ हे त्यांचे पती होते.

किशोरी बल्लाळ यांनी 1960 मध्ये कन्नड चित्रपटातून मनोरंजन विश्वात पाऊल ठेवलं होतं. त्यानंतर त्यांनी जवळपास 72 चित्रपटांमध्ये भूमिका साकारल्या आहेत. 2004 मध्ये प्रदर्शित झालेल्या आशुतोष गोवारीकर दिग्दर्शित ‘स्वदेस’ चित्रपटात त्यांनी केलेली ‘कावेरी अम्मा’ची भूमिका प्रचंड लोकप्रिय ठरली होती. शाहरुखने साकारलेल्या मोहन भार्गवसाठी मातृतुल्य व्यक्तिरेखा त्यांनी साकारली होती. बल्लाळ यांनी राणी मुखर्जीसोबत ‘अय्या’, तर दीपिका पदुकोणसोबत लफंगे परिंदे या सिनेमातही काम केलं होतं.

हेही वाचा – सचिनला माझे अंत्यसंस्कार करुदे, प्रख्यात गायिकेची आत्महत्या

आशुतोष गोवारीकरांनी ट्विटरवर पोस्ट लिहित किशोरी बल्लाळ यांना श्रद्धांजली अर्पण केली आहे. “किशोरी बल्लाळ यांच्या निधनाने प्रचंड दु:ख झालं आहे. मायाळू आणि प्रेमळ स्वभावामुळे तुम्ही कायमस्वरुपी आमच्या स्मरणात राहाल. ‘स्वदेस’मध्ये तुम्ही साकारालेली कावेरी अम्मा अविस्मरणीय आहे. तुमची नेहमी आठवण येईल” असं लिहित गोवारीकरांनी त्यांचा फोटोही शेअर केला आहे.

HEARTBROKEN! ? Terribly sad about the passing away of #KishoriBallal ji!! Kishori ji… you will be remembered for your generously kind, warm and affable persona! And your unforgettable performance as #Kaveriamma in #Swades !! You will surely be missed!! ?‍♂️ pic.twitter.com/DIAlnhLOgu

— Ashutosh Gowariker (@AshGowariker) February 18, 2020

Swades Actress Kishori Ballal Dies