झोपण्यापूर्वी कधीही करू नका या 4 गोष्टी; अन्यथा आरोग्य येईल धोक्यात

दिवसभर आपण इतकं काम, प्रवास करतो की दिवस कसा जातो हे समजतच नाही. मग त्यात ऑफिसमधलं काम असो,तासनतास फोनवर स्क्रोल करणे किंवा तुमचा आवडता टीव्ही शो पाहणे असो, याचा परिणाम आपल्या शरीरावर होतं असतो आणि रात्रीच्या झोपेवरसुद्धा. पण  बऱ्याच वेळा आपण जाणूनबुजून किंवा नकळत अशा गोष्टी करत असतो, ज्यामुळे हळूहळू आपल्या आरोग्याला खूप नुकसान होत असते. प्रसिद्ध गॅस्ट्रोएन्टेरोलॉजिस्ट डॉ. सौरभ सेठी यांनी या विषयावर एक व्हिडिओ शेअर केला आहे. त्यांनी रात्री झोपण्यापूर्वी कोणत्या चार गोष्टी आहेत ज्या टाळल्या पाहिजेत हे सांगितलं आहे. अन्यथा आरोग्यावर दुष्परिणांम होऊ शकतात.

हे जाणून घेणे खूप महत्वाचे आहे कारण रात्रीच्या नित्यक्रमाचा आपल्या मानसिक आणि शारीरिक आरोग्यावर थेट परिणाम होतो.

जड अन्न खाणे टाळा. डॉ. सेठी म्हणतात की ते रात्री कधीही जड जेवण करत नाहीत, विशेषतः झोपण्यापूर्वी. जेव्हा तुम्ही झोपण्यापूर्वी जड जेवण करता तेव्हा पचनक्रियेत अडचणी येतात. इन्सुलिनची पातळी वाढते आणि झोपेच्या गुणवत्तेवरही परिणाम होतो. डॉ. सेठी म्हणतात की ते नेहमीच झोपण्यापूर्वी दोन किंवा तीन तास आधी जेवण पूर्ण करतात.

रात्री झोपण्यापूर्वी बेडवर झोपून फोन वापरणे मजेदार असू शकते, परंतु ही सवय एकूण आरोग्यासाठी चांगली नाही. डॉ. सेठी असेही म्हणतात की जर तुम्ही झोपण्यापूर्वी फोनवर स्क्रोल करत राहिलात तर त्यातून निघणारा निळा प्रकाश मेलाटोनिनच्या उत्पादनावर परिणाम करतो.यामुळे  तासंतास तुम्हाला झोप येत नाही, ज्यामुळे तुमच्या मानसिक आणि शारीरिक आरोग्यावर परिणाम होतो. डॉक्टर म्हणतात की ते झोपण्यापूर्वी किमान एक तास आधी फोन वापरणे थांबवतात.

काही लोकांना रात्री चहा किंवा कॉफी पिण्याची सवय असते. पण ही सवय आरोग्यासाठी चांगली नाही. डॉ. सेठी म्हणतात की कॅफिनचे अर्धे आयुष्य पाच ते सहा तास असते. म्हणून, ते झोपेच्या किमान सहा तास आधी चहा किंवा कॉफी पिणे टाळतात. असे केल्याने झोपेच्या गुणवत्तेवरही परिणाम होत नाही.

आयुष्यात थोडा ताण येणे सामान्य आहे पण त्याला तुमच्यावर वर्चस्व गाजवू देऊ नका. कधीही कोणत्याही गोष्टीचा जास्त ताण घेऊन झोपू नका. डॉक्टर सेठी म्हणतात की मानसिक ताणाचा तुमच्या आतड्याच्या आरोग्यावर थेट परिणाम होतो. जर तुम्ही गरजेपेक्षा जास्त ताण घेऊन झोपायला गेलात तर आतड्याचे आरोग्य देखील बिघडते. याचा तुमच्या एकूण मानसिक आणि शारीरिक आरोग्यावर परिणाम होतो. डॉक्टर म्हणतात की मन शांत ठेवण्यासाठी ते झोपण्यापूर्वी खोल श्वासोच्छवास आणि योग निद्राची मदत घेतात.