मेकअप आणि ब्युटी रुटीन होईल सोपं! नक्की ट्राय करा ‘हे’ भन्नाट हॅक्स, वेळही वाचेल
Makeup and Beauty Hacks : दररोजच्या ब्युटी रुटीनमध्ये काही छोट्या-छोट्या गोष्टींसाठी बराच वेळ जातो. मात्र, काही सोप्या ब्युटी हॅक्सच्या मदतीने या समस्या कमी वेळात सहज सोडवता येऊ शकतात. जाणून घ्या रोजच्या वापरातील काही भन्नाट ब्युटी ट्रिक्स.
ब्युटी रुटीनकडे लक्ष देताना प्रत्येक गोष्टीसाठी महागडी प्रोडक्ट्स किंवा पार्लर ट्रीटमेंटचीच गरज असते असे नाही. त्वचा आणि केसांची योग्य काळजी ही सातत्याने करण्याची प्रक्रिया आहे आणि त्यासाठी रोजच्या छोट्या-छोट्या सवयीही तितक्याच महत्त्वाच्या ठरतात. अनेकदा आपल्या ब्युटी रुटीनमध्ये अशा काही साध्या गोष्टी असतात, ज्या योग्य पद्धतीने केल्यास वेळ आणि मेहनत दोन्ही वाचू शकतात. विशेष म्हणजे यापैकी अनेक उपाय घरच्या घरी सहज करता येण्यासारखे आहेत. त्यामुळे रोजच्या धावपळीतही स्वतःसाठी थोडा वेळ काढून ब्युटी रुटीन अधिक सोपे आणि प्रभावी बनवता येऊ शकते. तुम्हालाही कमी वेळात स्वतःची अधिक चांगली काळजी घ्यायची असेल, तर हे सोपे ब्युटी हॅक्स नक्की जाणून घ्या.
ओठांचे टॅनिंग कसे काढावे
चेहरा आणि हात-पायांवर सनस्क्रीन लावताना अनेकदा ओठांकडे दुर्लक्ष होते. मात्र, सूर्यप्रकाशाच्या सततच्या संपर्कामुळे ओठ काळवंडू शकतात. ओठांची काळजी घेण्यासाठी अर्धा चमचा अ‍ॅलोवेरा जेलमध्ये बारीक केलेली साखर मिसळून हलक्या हाताने स्क्रब करू शकता. ओठांवर जास्त घासू नका. हा उपाय १० ते १५ दिवस नियमित केल्यास फरक जाणवू शकतो.
ड्राय फेस वाइप्सचा असा करा वापर
फेस वाइप्सचे पॅकेट उघडे राहिल्याने त्यात हवा जाते आणि वाइप्स कोरडे होतात. अशावेळी संपूर्ण पॅकेट फेकून देण्याची गरज नाही. त्यात थोडे पाणी घालून वाइप्स पुन्हा ओलसर करता येतात. मात्र, वाइप्सचा वास किंवा पोत बदलला असेल तर त्यांचा वापर टाळणे योग्य आहे.
नेलपॉलिश पटकन सुकवण्यासाठी
नेलपॉलिश लावल्यानंतर ते सुकण्यासाठी बराच वेळ वाट पाहावी लागते. अशावेळी एका भांड्यात थंडगार बर्फाचे पाणी घ्या आणि त्यात काही वेळ बोटे बुडवून ठेवा. यामुळे नेलपॉलिश लवकर सुकण्यास मदत होऊ शकते.
सुजलेल्या डोळ्यांसाठी काय करावे
सकाळी उठल्यानंतर डोळ्यांखाली सूज दिसत असेल तर थंड केलेल्या ग्रीन टी बॅग्ज डोळ्यांखाली ठेवू शकता. साधारण १० मिनिटे ठेवल्यानंतर त्या काढून चेहरा स्वच्छ करा. डोळ्यांवर कोणताही उपाय करताना जळजळ किंवा त्रास जाणवल्यास लगेच वापर थांबवा.
स्लीक हेअर लूकसाठी
स्लीक बन किंवा स्लीक हेअरस्टाइल करताना छोटे बेबी हेअर वारंवार बाहेर येतात. ते व्यवस्थित सेट करण्यासाठी स्वच्छ टूथब्रशवर थोडासा हेअर स्प्रे लावा आणि बेबी हेअरवर हलक्या हाताने फिरवा. यामुळे छोटे केस व्यवस्थित सेट करून स्लीक लूक मिळवण्यास मदत होऊ शकते.
