मूग डाळ सोबत बनवा क्रिस्पी बटाटा वडा, इव्हनिंग स्नॅक्ससाठी परफेक्ट आहे रेसिपी
Evening Snacks Recipe: संध्याकाळच्या चहासोबत बटाटा वडा खायचा विचार करत असाल तर यावेळी ही रेसिपी ट्राय करा. नेहमीच्या बेसन ऐवजी मूग डाळ सोबत बनवा. पाहा सोपी रेसिपी
संध्याकाळच्या नाश्त्यासाठी गरमागरम बटाटा वडा खायला कुणाला आवडणार नाही? चहासोबत क्रिस्पी वडा आणि तिखट-गोड चटणीची जोडी अनेकांची आवडती आहे. नेहमी बेसनाच्या आवरणात तयार केला जाणारा बटाटा वडा यावेळी थोड्या वेगळ्या पद्धतीने करून पाहा. बेसन किंवा चणा डाळ न वापरता मूग डाळीच्या मिश्रणात बटाट्याचे गोळे घोळवून हा वडा तयार करता येतो. बाहेरून कुरकुरीत आणि आतून मऊ असलेला हा वडा चवीला खमंग लागतो. घरच्या घरी सहज उपलब्ध असलेल्या पदार्थांपासून ही रेसिपी तयार करता येत असल्याने नाश्त्यासाठी हा एक सोपा पर्याय ठरू शकतो. विशेष म्हणजे, तळण्याऐवजी अप्पे पात्राचा वापर करून कमी तेलातही ही रेसिपी करता येते. त्यामुळे नेहमीच्या बटाटा वड्याला थोडा वेगळा ट्विस्ट द्यायचा असेल, तर मूग डाळीचा हा वडा नक्की ट्राय करा.
साहित्य
• १ कप मूग डाळ
• ४ ते ५ उकडलेले बटाटे
• २ हिरव्या मिरच्या
• ४ ते ५ लसूण पाकळ्या
• १ छोटा तुकडा आलं
• १ चमचा मोहरी
• अर्धा चमचा जिरे
• चिमूटभर हिंग
• अर्धा चमचा हळद
• २ चमचे तांदळाचं पीठ
• कोथिंबीर
• कढीपत्ता
• चवीनुसार मीठ
• तळण्यासाठी तेल
कृती
सर्वप्रथम मूग डाळ स्वच्छ धुऊन काही तास पाण्यात भिजत ठेवा. डाळ चांगली भिजल्यानंतर त्यातील पाणी काढून ती मिक्सरमध्ये थोडं पाणी घालून जाडसर वाटून घ्या. मिश्रण खूप पातळ होणार नाही, याची काळजी घ्या. यानंतर उकडलेले बटाटे सोलून कुस्करून घ्या. हिरवी मिरची, लसूण, आलं आणि जिरे यांची जाडसर पेस्ट तयार करा. कढईत थोडं तेल गरम करून त्यात मोहरी, जिरे, हिंग आणि कढीपत्ता घाला. त्यानंतर तयार केलेली पेस्ट घालून परता. त्यात हळद, मीठ आणि मॅश केलेले बटाटे घालून सर्व मिश्रण व्यवस्थित एकजीव करा. शेवटी कोथिंबीर घालून गॅस बंद करा.
बटाट्याचं मिश्रण थंड झाल्यावर त्याचे छोटे गोळे तयार करा. दुसरीकडे वाटलेल्या मूग डाळीत तांदळाचं पीठ, थोडी हळद आणि मीठ घालून घट्टसर मिश्रण तयार करा. तयार बटाट्याचे गोळे या मिश्रणात व्यवस्थित बुडवून घ्या. कढईत तेल गरम करून हे गोळे मध्यम आचेवर सोनेरी आणि कुरकुरीत होईपर्यंत तळून घ्या. कमी तेलात वडा खायचा असेल तर अप्पे पात्राचाही वापर करू शकता. अप्पे पात्राला थोडं तेल लावून त्यात मूग डाळीच्या मिश्रणात बुडवलेले गोळे ठेवा आणि दोन्ही बाजूंनी सोनेरी होईपर्यंत भाजून घ्या. तयार झालेले गरमागरम वडे हिरवी चटणी किंवा गोड-तिखट चटणी किंवा चहासोबत सर्व्ह करा.
