डेंग्यू झाल्यानंतर बकरीचे दूध पिताय? थांबा! होते नुकसान, संशोधकांचा दावा काय?

सध्या राज्यात अनेक ठिकाणी मुसळधार पाऊस सुरु आहे. त्यामुळे ठिकठिकाणी पाणी सचले आहे. या साचलेल्या पाण्यावर डेंग्युच्या डासांची उत्पत्ती होते. त्यामुळे देशातील काही भागांमध्ये डेंग्यूचे रुग्ण दिवसेंदिवस वाढताना दिसत आहेत. बहुतांश लोकांमध्ये डेंग्यूची सामान्य लक्षणे दिसतात, पण काहींमध्ये हा आजार गंभीर होतो. अचानक प्लेटलेट्सची संख्या कमी होऊ लागते. यासाठी काही लोक बकरीचे दूध पितात. आपल्या देशात असा समज आहे की बकरीचे दूध प्लेटलेट्स वाढवते, पण वैद्यकीय संशोधन हा दावा खोडून काढते.

नॅशनल लायब्ररी ऑफ मेडिसिनमध्ये प्रकाशित संशोधनात असे सांगितले आहे की बकरीचे दूध प्लेटलेट्स वाढवण्यास मदत करत नाही, उलट कच्च्या बकरीच्या दूधामुळे ब्रुसेलोसिससारख्या जीवाणूजन्य संसर्गाचा धोका वाढू शकतो. हा संसर्ग डेंग्यूमुळे कमजोर झालेल्या शरीरासाठी आणखी धोकादायक ठरू शकतो. या संशोधनात स्पष्ट करण्यात आले आहे की डेंग्यूदरम्यान बकरीच्या दूधाचे सेवन आरोग्यासाठी धोकादायक ठरू शकते आणि ते सुरक्षित मानले जाऊ शकत नाही. बकरीचे दूध प्लेटलेट्स वाढवते याचा कोणताही पुरावा मिळालेला नाही.

वाचा: हैदराबाद गॅझेट, सातारा गॅझेट म्हणजे नेमकं काय? सरकार आणि जरांगेंमध्ये त्यावरुन झालेला वाद काय?

डेंग्यूमध्ये बकरीचे दूध पिण्याने शरीराचे नुकसान

दिल्लीच्या मॅक्स हॉस्पिटलमधील डॉ. रोहित कपूर सांगतात की डेंग्यूमध्ये बकरीचे दूध पिण्याचा सल्ला अनेक ठिकाणी दिला जातो. पण याबाबत कोणताही ठोस वैज्ञानिक पुरावा नाही. बकरीच्या दूधात प्लेटलेट्स वाढवणारा कोणताही घटक आढळलेला नाही. उलट, यामुळे पोटात संसर्ग होऊ शकतो. कच्चे बकरीचे दूध ब्रुसेलोसिसचा धोका वाढवू शकते, जो एक गंभीर आणि धोकादायक संसर्ग आहे. डेंग्यू झाल्यानंतर शरीर आधीच कमजोर असते आणि अशा प्रकारचा संसर्ग आरोग्यासाठी आणखी धोका निर्माण करू शकतो. त्यामुळे, डेंग्यूमध्ये बकरीचे दूध पिणे योग्य नाही आणि यामुळे शरीराचे नुकसानही होऊ शकते. रुग्णांनी डॉक्टरांच्या सल्ल्याशिवाय कोणतेही घरगुती उपाय किंवा दूधाचे सेवन टाळावे.

मग लोक बकरीचे दूध का पितात?

डॉ. रोहित सांगतात की जर एखाद्या व्यक्तीला कोणताही संसर्ग किंवा ताप नसेल आणि त्याला पोटाशी संबंधित कोणताही आजार नसेल, तर तो कधीतरी बकरीचे दूध पिऊ शकतो. पण लोक डेंग्यूदरम्यान प्लेटलेट्स वाढवण्यासाठी हे दूध पितात. हा एक मोठा गैरसमज आहे. काय होते, काही रुग्णांमध्ये काही कालावधीनंतर प्लेटलेट्सचा स्तर आपोआप सुधारू लागतो. पण त्यांना वाटते की हे बकरीच्या दूधामुळे झाले. या गैरसमजामुळे लोक एकमेकांना हे दूध पिण्याचा सल्ला देतात, पण डेंग्यूमध्ये हे पिऊ नये.

डेंग्यूमध्ये प्लेटलेट्स वाढवण्यासाठी काय करावे?

• पुरेशा प्रमाणात पाणी प्या आणि शरीर हायड्रेटेड ठेवा.
• प्लेटलेट्सची संख्या जाणून घेण्यासाठी वेळोवेळी रक्त तपासणी करा.
• निरोगी आहार घ्या आणि थकवा टाळा.
• कोणताही घरगुती उपाय करण्यापूर्वी डॉक्टरांचा सल्ला घ्या.
• जर प्लेटलेट्स खूप कमी असतील, तर फक्त डॉक्टरांनी सांगितलेली औषधे घ्या.