दारूच्या बाटलीत टाकतात जिवंत साप, टॉनिक म्हणून प्यायले जाणारे हे मद्य बनते तरी कसे?

जगभरातील जवळपास सर्व देशांमध्ये दारूचे सेवन केले जाते. दारू बनवण्याची पद्धतही वेगवेगळ्या ठिकाणी वेगवेगळी आहे. मात्र काही देशांमध्ये दारू तयार करण्यासाठी चक्क सापांचा वापर केला जातो. या वाईलनला स्नेक वाईन असे नाव आहे. ही वाईन जगातील सर्वात अनोख्या आणि विचित्र मद्यप्रकारांपैकी एक मानली जाते. या वाईनचे खास महत्त्व म्हणजे वाटलीत संपूर्ण साप टाकलेला असतो. काही साप जिवंत टाकले जातात, तसेच काही विषारी सापही टाकले जातात. या दारूबाबत सविस्तर माहिती जाणून घेऊयात.

सापापासून तयार होणारी वाईन ही चीन आणि दक्षिण-पूर्व आशियातील अनेक देशांमध्ये लोकप्रिय आहे. ही वाईन तयार करण्यासाठी सापाला काचेच्या बाटलीत किंवा बरणीत ठेवले जाते आणि त्यामध्ये तांदूळ, गहू किंवा इतर धान्यांपासून तयार केलेले मद्य भरले जाते. त्यानंतर हे मिश्रण अनेक महिने तसेच ठेवले जाते, जेणेकरून सापातील घटक मद्यामध्ये मिसळले जातील. त्यानंतर हे मद्य मोठ्या आवडीने प्यायले जाते.

हजारो वर्षांचा इतिहास

स्नेक वाइनचा इतिहास हजारो वर्षे जुना आहे. पारंपरिक चिनी वैद्यकशास्त्रामध्ये या वाईनचा वापर दीर्घकाळापासून केला जात आहे. चीनशिवाय व्हिएतनाम, थायलंड, लाओस, कंबोडिया, उत्तर कोरिया आणि जपानच्या काही भागांमध्येही अशा प्रकारची वाईन मोठ्या प्रमाणावर लोकप्रिय आहे. स्नेक वाइन शरीराला ताकद देण्यास, सांधेदुखी कमी करण्यास, केसांच्या वाढीस मदत करण्यास आणि त्वचेशी संबंधित काही समस्यांवर फायदेशीर ठरते असा लोकांचा विश्वास आहे.

सापाच्या विषामध्ये प्रोटीन असते?

साप दिसतात अनेकांची झोप उडते, कारण सापाच्या विषाबाबत लोकांच्या मनात नेहमीच भीती असते. तज्ज्ञांच्या मते, सापाचे विष प्रोटीनपासून बनलेले असते. मद्यामध्ये असलेले अल्कोहोल या प्रथिनांचे विघटन करू शकते, त्यामुळे विषाचा प्रभाव मोठ्या प्रमाणात कमी होतो. याच कारणामुळे योग्य पद्धतीने तयार केलेली स्नेक वाइन सामान्यतः सुरक्षित मानली जाते. मात्र अनेकदा बाटलीत ठेवलेला साप पूर्णपणे मेलेला झालेला नसतो. 2013 साली एका महिलेने स्नेक वाइनची बाटली उघडताच बाटलीतील सापाने तिला दंश केला होता. त्यामुळे अशा प्रकारचे मद्य पिताना काळजी घेण्याचे आवाहन करण्यात आलेले आहे.